يا ساكن جبين السما نفسي أضمك

تأملات في لقاء لم يزل جنينا"

يا ساكن جبين السما نفسي اضمك

واقولك بحبك
بحبك بحبك
ومهما تشرق تغرب بحبك
بتبعد تقرب بحبك بحبك
بتاخد عيوني مع كل طلعة
برفرف بقلبي واشد فـجناحي
و اطير جنب منك
مبعدش عنك
في نومك في صحوك
انا جنب منك
ما انا حتة منك
ومهما بتبعد بـحسك قصادي
عبيرك ساجني
ويا محلي سجنك
ولا ضعف مني
ولا قوة منك
أسير بالارادة
و لو غصب عنك
يا ماسك وريدي بتنقش تاريخي
بدايتي ونهايتي
بتنحت في قلبي
بتعزف حكايتي
علي الناي بخفة
سطورك قصيدتي
وعشقك روايتي
علي سفح قلبي وقفت وبنادي
وعارف هتسمع
وعاوز اقولك
ومن غير ما اقولك
ما صوتي واصلك
و قلبك شايفني
و عينك تدلك
علي الارض واقف بشوف طير وطاير
وبجري كما الطفل وافرد دراعي
وبـحسد جناحه
لانة في صباحه
بيطلق سراحه
يقرب حبيبه
و يرمي فـ حموله
وينفض جراحه


يا طيري ما ترجع
بعادك بيوجع
و وعد اما ترجع
,,, ,,, ,,,


هترجع يا طيري
تلاقيني واقف
كما كنت واقف
في لحظة قلوعك
للحظة رجوعك
هتشرق في لحظة
وهجري وهتجري
وترمي في حجاتك
تلم في شتاتي
وأّلم في أهاتك
و ع الارض نحكي
ونضحك ونبكي
هاشيلك واضمك
ترفرف برجلك
هتبكي في عيوني
وهمسح دموعك
في حضني هتشكي
فـ هلمس خدودك
هتضحك عيونك
فـ تفرح وتحكي
عشان حتة منك
عشان حتة مني
وننسي اللي رايح
وننسي اللي جاي
وتعلي حكاياتي
وتحكي حكاياتك
و ننسي حجاتك
ونشبك ايدينا
ونجري نغني
ونفضل نغني
ونجري نغني و ... نفضل نغني
.

الحكاية مش حكاية قلب حب

الحكاية مش حكاية قلب حب
ما القلوب عمالة تعشق
الحكاية مش حكاية هجر قلب
ما القلوب عمالة تنشق
الحكاية اني بتنفس في بعدك
بس بتنفس هواكي
الحكاية اني بتكلم في بعدك
بس بتكلم معاكي
خطوتي شابكة في خطاكي
شمسي ما تفارق سماكي
لو عيون الناس قالتلي لية لوحدك ؟
صدقيني بكون معاكي


دة الحكاية مهما كانت باينة خالصة
مش هتخلص يا حبيبتي لو معاكي


مهما روحتي وغبتي عني لسه شايلك جوة عيني
اصل سحرك مش طبيعي يا حبيبتي صدقيني
وانتي مش محتاجة اقولك
اني نسمة تحت ضلك
اني تاج في قلب عرشك
دة الحكاية مهما كانت باينة خالصة
مش هتخلص صدقيني لو معاكي


يا حبيبتي فوق خدودك بوسة من القلب اللي ضمك
ايوة بينا الف ميل بس انا قادر اضمك
مهما بتشدي في شراعك
مهما بتجري في قلوعك
حضني مستني في رجوعك
دة الحكاية مهما كانت باينة خالصة
مش هتخلص غصب عني لو معاكي


ايوة مش محتاج اغمض لاجل اشوفك
فوق خدودي يا حبيبتي لسه انا حاضن كفوفك
عايشة بين رمشي وجفوني
انتي مكتوب فوق جبيني
مانتي ساكنة في نن عيني
دة الحكاية مهما كانت باينة خالصة
مش هتخلص يا حبيبتي لو معاكي


يا حبيبتي الوريد عطشان لدمك
روحي مشتاقة تضمك
ياللاه قومي وانسي همك
فوق كتافي ارمي حملك
اندهيلي
دة الحكاية مهما كانت باينة خالصة
مش هتخلص
لاء دي راح تبدأ معاكي
.

إرجعيلي

إرجعيلي
رجعي الصوت للسواقي
وإرحمي القلب اللي باكي
بعد منك لسه عايش
بعد منك
لسه باقي
أيوة عايش ... بس ميت


بعد منك لسه بضحك
أيوة بضحك
بس جوة الضحكة ... باكي


إجعيلي وهاتي شمس الكون معاكي
هاتي ضحكة خطوتي
هاتي بسمة في شفتي
وإنفضي دمي في عروقي
كلة سابني في ديل خطاكي


إرجعيلي وخّضري أرضي بنورك
ورجعي الميل للسنابل
طرح أرضي لسه دابل
طلتك راح تسقي زرعي
تطرح الاغصان طيورك


إرجعيلي وحلقي في قلبي بشراعك
مهما موج البحر يقسي
جوة منك بس مرسي
حركي الضومان بخفة
رسي قلبي بين دراعك


إرجعيلي ورجعي لحظة ميلادي
أصل انا مولود عشانك
والوليد محتاج حنانك
إرجعيلي وإحضنيني
وإكتبيلي تاريخ ميلادي


إرجعيلي
رجعي الصوت للسواقي
هاتي شمس الكون معاكي
خضري أرضي بنورك
حلقي في قلبي بشراعك
رجعي لحظة ميلادي
.

شـيء من الخـوف

شيء من الخوف انكتب فوق الجبين
ومش عارف
اذا كنت انا خايف واللي مين


واللي انا الخوف ؟
واللي انا الاتنين ؟


ولية الانين ؟
ولية شايلة علي كتافي من سنين ؟
حتي وانا محني وحزين
او حتي لو فرحان
فيه شيء من الخوف


شيء من الخوف
عشش علي القلب اللي اتولد موجوع
وبحس بيه بين الضلوع
بيبان في حرقة دمعتي
او لما تعلي ضحكتي
بلمح خيالة ماشي جنبي في سكتي
وساعتها بتلفت ورايا
بلقاني وحدي في دنيتي
فـ اسرح واقول
يمكن عشان عايش وحيد
فـ فـيا شيء من الخوف


شيء من الخوف
معرفش مين فينا اللي ضيف علي التاني
معرفش مين فينا اللي اتولد في التاني
وسعات بقول مولود جبان
وسعات بقول يمكن اتاني
شيء من الخوف


شيء من الخوف اتزرع جوة القلوب
مبدور علي كل الدروب
معصوبة ليه خطوتي في الطريق من غير ذنوب
ولما افكر من الخوف اهرب
افتكر ان الهروب
ده في حد ذاتة
شيء من الخوف
.

جوة مني وجوة منك ألف اّاّاّه

جوة مني وجوة منك

ألف اّه

جوة منا بيتسرق نبض الحياة
جوة منا بنختفي
جوة منا بنتعدم
كام ألف مره في الحياة
و منقولش لا
هوه ده قانون الحياة

يا حبيبتي مش بعاتبك لما سِبتي ف مرة إيدي
لسه رِحتك فوق كفوفي
لسه حاسس نبض قلبك
مانتي زيي شايلة همك
هوه كان الذنب ذنبك
صدقيني مش بعاتبك

يا حبيبتي مش بلومك الطريق هوه اللي سابنا
و المفارق بينا تبعد
خيلنا كان هوه اللي جامح
والامل كان فينا سارح
فاختفت منا الملامح
مش بلومك لاء مسامح

يا حبيبتي إوعي تبكي أو أحس بليل دموعك
غصب عني وغصب عنك
القلوب كانت معاهدة
و الخطاوي علينا شاهدة
فرقت بينا السكك والدروب كانت معاندة
هوه مين ماشي في طريقه في الزمن دة !!!

يا حبيبتي نفسي أشوفك حتي صدفة ... مرة صدفة
حتي لو مانتيش لوحدك
حتي لو كان فيه جديد
نفسي أضمك بين عيوني من بعيد
جوه مني اّاّاّهه بتفـل الحديد
هوه يعني كتير عليا تبقي صدفة ومن بعيد

يا حبيبتي جوة مني
وجوة منك
ألف اّاّاّه
نفسي أغمض عيني
وأفتحها
... ألقاكي
ترجعلي الحياة
.

سـقـع دمـاغـك ,,, كـبـــر وعـيـش

سقع دماغك
كبر وعيش
كبر وعيش من غير قلق
اصل الحكاية متستاهلش
غيرك مكبرش اتخنق
قلبة اتحرق
كبر دماغك متعاندش

اوعاك في يوم تحسبلها
صدقني مش هتحلها
هتدوق مرار من مرها
هتتوه في ويلها وذلها
يا عم سيبك متحاولش

سقع دماغك
بطل صداع
بطل صداع من غير سبب
لاحسن نقول مصدر شغب
وفي لحظة كله هيتقلب
صدقني هتشوف العجب
قللب في عيشك بالادب
كبر دماغك راح تعيش

سقع دماغك
عيش بالاونطة
عيش بالاونطه وللعب القرد في سلاسل
غني واتنطط
ارقص علي الحيط
هيص وسقف للي طالع
هيص وسقف للي نازل

سقع دماغك

كبر وعيش
عيش فيها عابر
عيش فيها زاهد
خليك محايد
او مهاند
اياك تفكر
اوعاك تعاند
وبلاش تعيش درو المجاهد

لاعب حواجبك
مصمص شفايفك
قرقض ضوافرك
او هز رجلك
لكن تفكر
إنته اتخبلت ؟
اهو ده اللي ناقص
اهو ده اللي ميصحش يا عاقل

بطل سواد
عيش الحياة
خدها بتفاؤل

وبلاش تقولي

عبارة غرقت شايلة ناس شايلين في هم
خللي السمك ياكل يا عم

هتقولي كام بيت اتهدم تحت الصخور
احسن عشان راح تتبني بكرة قصور

هتقولي كام قطر اتحرق جواه بشر
مين بس قالك دول بشر ؟

هتقولي دول متبهدلين
متعذبين
متمرمطين
واقفين طابور
علشان رغيف
الطب قالك عيش نحيف

بطل سواد
عيش الحياة
خدها بتفاؤل

كل اللي هتقولة اتحفظ
مكتوب في محضر واتحفظ
جوة في ملف واتحفظ
محطوط في ادراج واتحفظ
كل اللي مات ع المشرحة و ع الجبانات وكلة فيها بيتحفظ
كل اللي راح
كل اللي جاي
كل الكلام
كلة اتحفظ


سقع دماغك
كبر وعيش
سيب اللي فاهم يشتغل
لو بس تسكت تنخرس
من ايده راح تشرب عسل
و بلاش بقي كترالمناهدة و الكلام
عمال تزعق من بعيد
عمال تشوح والسلام
وكمان بلاش كتر الهبل
اصل انتوا غاويين الكسل
الفول عماكوا
اسكت عشان ريحتك بصل

سقع دماغك
واسكت بقي
اسكت بقي ومتجبش سيرة
احنا في تقدم
وكلة فل
واسمع بقي الحاجه الخطيرة
بيقولوا فيه اسكان شباب وكل شاب له جزيرة
مبنية علي احدث طراز
تسليم علي المفتاح
بجنينة كبيرة
وانته كده بكتر الكلام والدروشة
ممكن تعطل في المسيرة
يرضيك تعطل في المسيرة ؟

سقع دماغك
خليك في حالك
اوعاك تفكر مين علي الكرسي
انته مالك
ربي في عيالك
عامل حساب اوي للي جاي ؟
طب ما اللي راح ناهب في مالك
ال يعني دية معضلة شغلة في خيالك
بمرايا او من غير
هتشوف جمالك

سقع دماغك
كبر وعيش
سيب اللي فاهم يشتغل
فكر في ماتش المنتخب
في الدوري
شوف مين خسر
ومين كسب
امسك ريموتك
واسند بضهرك ع الكنب
شوفلك مسلسل
قلب وشوف مين اللي فركش
أو خطب

سقع دماغك
كبر وعيش
كبر وعيش من غير قلق
اصل الحكاية متستاهلش
غيرك مكبرش اتخنق
قلبة اتحرق
كبر دماغك متعاندش
كبر دماغك راح تعيش
واوعاك تفكر
من غير دماغك راح تعيش

أنـا مـليـــت

أنا مليت
انا مليت أكون واقف علي بابك
 ومستني
سحابة صيف تطمني
بقالي كتير علي ده الحال
 مجاش مرسال يطمني
وخايف يوم تغيب شمسك
وأشوف قمرك يغيب عني
يمر اليوم في عتمة ليل طويل
والوحدة تقتلني
عجيب امرك
وزاد مرك
وطول عمرك
بتأمري ... وأقول امرك
لكن مليت
أنا مليت متسمعينيش
برغم إني علي بابك
دنا متوضي من نيلك
دنا صليت علي ترابك
وياما إتكحلوا بدمي
وداس الخد خطابك
أسير شمسك وأنا محني
ونقطة ميه في سحابك
أنا كالموج بيتكسر
 علي صخرك علي بابك
زرعت الصبر ... من طينك
وياما عرقت ... في جبينك
حرام تنسي إللي عاشقينك
وتجري علي إللي سارقينك
سقوكي المـُر في شبابك
أنا زعلان علي امبارح
علي بكره إللي لسه مجاش
لكن عشمـّان تفوقي في يوم
وأشوف الظلم مبيقواش
عشان خاطري
 بلاش أبعد بعيد عنك
عشان الظلم مخلاّش
عشان خاطري
 بلاش أتباع في مرة بلاّش
عشان خاطري
 بلاش أبعد
دنا منك ومستغناش
دنا منك ... ومستغناش

أنـــا خـــايــــــف !!!

أنا خايف
لكن من إيه ؟
مانيش عارف
لكن خايف
أنا في ضلمة
غريق في الضلمة مش شايف
لكن سامع
أّنين جوايا بيعافر
وصوت أنفاسي كان حوالية بيعافر
وبلة ريق كانت في الحلق بتعافر
أنا جوايا ضملة كتير
واّاّاّاّهه كبيرة وسط ضلوعي بتعافر
ومش شايف
ومش عارف
ما أنا خايف
لكن من إيه ؟
مانيش عارف
لكن خايف
ملكني الخوف في وسط الضلمة خلاني
أغمض عيني وأتغطي بكّفيني
نزل عرقي علي جبيني
تواسية بالدموع عيني
بجس القلب أشوف نبضة
... لقيت النبض كان واقف
عشان خايف
لكن من إيه ؟
مانيش عارف
لكن خايف
أنا محبوس ما بين قضبان ضلام وسكوت
وجوة ضلوعي شيء مكبوت
خنقني الخوف بحد الموت
حاولت أصرخ بعلو الصوت
لقيت الخوف ملي قلبي
اللي كان نبضة اكيد واقف
عشان خايف
لكن من إيه ؟
مانيش عارف
لكن خايف
وحيد في الضلمة متقيد
و متكتف
و متحاوط بسور الخوف
في وسط البرد متعري
مفيش فوقي ولا تحتي
أنا مكشوف
بقالي سنين تمـُر الشمس من فوقي
متشرقشي
أقول ده كسوف
أنا مسجون
و سجاني مهوش معروف
علي الإفراج مانيش ملهوف
و وري قضباني أنا واقف
وري القضبان أنا خايف
لكن من إيه ؟
مانيش عارف
لكن خايف
أنا جوايا بيــــر محفور
حفرتة بإيدي وسكنته بقالي سنين
علي جدرانه
راح تلقي مكان إيدي علي الجنبين
سكنته عشان مفيش بكرة ولا بعدين
و لو في العمر فيه ساعتين
هقضيهم وأنا مستني كدة واقف
هقضيهم وأنا خايف
لكن من إيه ؟
مانيش عارف
لكن خايف
... أنا خايف
.