إشتقــــت لــــــكـ

إشتقت لك
ولا يوم هقول
غير إني ياما إشتقت لك
و بحن لك
مقدرش أكدب في الحنين
إللي إمتلك
قلبي في هواك
منك ولك
و سعات كتير بنسي الفراق
و بروح إلك
كل أما أتوه عنك بعيد
برجع إلك
لكني برجع في الخيال
و أنده إلك
كتير صحيت و ألقاني صوت
بيكلمك
أنا قلبي لك
و روحي لك
وعمري لك
الضحكه لك
والبسمه لك
كل الحجات من كتر شوقي
بتجري لك
حتي الخيال إللي فـ خيالي
كله لك
لكن صحيح صدق إللي قال
العشق لو فيك إمتلك
راح يقتلك
.

حبيبــــي ... الوقــــت بيـعـــدي

حبيبــــي ...
الوقت بيعدي
و أنا
لسه مادد يدي
صابر أنا لعنيك
لو جيت
هطير أنا من الشوق
و نعيش
والضحكه تعلي لفوق
حبيبي مد إيديك
حبيبــــي ...
أنا بابي بفتحلك
و إنته ترد الباب !
بالصمت بندهلك
والصمت كله عذاب
حبيبــــي ...
إنته اللي فيك الروح
و إنته اللي غاوي تروح
طب ليه تروح مجروح ؟
و أنا كلي ملك إيديك
حبيبــــي ...
بخاف لا القسوه تسرقني
و مر الصبر يخنقني
و أتوه و دروبي تشبكني
و أرحل وقلبي ناسيك
حبيبــــي ...
عيون الليل بتبتسمك
وشقشق في الفضي رسمك
كتبت أنا بالندي اسمك
و توهت جوه عنيك
حبيبــــي ...
لو إنته بعيد , قريب مني
ونفسي يا ريت تطمني
تقول راجع و تحضني
صدقني هجري عليك
حبيبــــي ...
الصبر ده ليه حدود
لكني بالأمل موعود
بحبك والهوي موجود
ده روحي منك ليك
حبيبــــي ...
يا ريت تقول راجع
كتير الليل يكون واجع
هترجع واللي مش راجع ؟
غلبت أحايل فيك
.

ياللي إنته مشيت

مش هستغرب !
ولا هسأل ليه ؟
ولا تاني هنادي عليك ترجع
أنا مرة نديت
و إنته اللي غويت
تخلق أوهام
وتعيش جواها تصدقها
بتموت في الخوف
والخوف توابيت
و إنته اللي مشيت
والسكه براح
رايح أو جاي
هما إتجاهين
وإنته إللي إخترت
تروح متجيش
إنته اللي مشيت
إوعاك تحسب إن أنا بنده
أو ليك راجع
أنا كده ديما خطوتي قدام
والسكه تنادي أقول حاضر
ولا عمري رجعت
أو حتي في مره ورايا بصيت
بيك من غيرك صدقني تمام
مش قبلك كنت زمان عايش
وأكيد من بعدك برضوا هعيش
وأن كنت حلمت معاك أفضل
ما كتير أحلام
تصبح أوهام
مع إني حلمت
وقلت يا ريت
و إنته إاللي إخترت تسيب الحلم
بس إنته نسيت
و إنته اللي مشيت

ياللي إنته مشيت
أنا قلبي براح
ومفيش أبواب
ولا سور عالي
ولا قفل حديد
وإن كنت نويت
ترحل
إرحل
أنا مش زعلان
ولا حتي سعيد
أنا قلبي يوماتي في صبح جديد
أنا قلبي براح
ويساعي كتير
ياللي إنته مشيت
إوعاك فاكر أنا ببكي عليك
عودت دموعي متنزلشي
أو حتي الشوق بياخدني إليك
الشوق صدقني ميقـتـلشي
وبفرض إن خدني الشوق مره
مبروحش بعيد
أصل أنا متعود ع الوحده
ودموعي متنزلش لوحده
راحت
باعت
هربت لبعيد
متعود ليه إنك تهرب ؟
و الخوف جواك هوه المهرب
جرب من خوفك كده تهرب
صدقني هترتاح طب جرب
وتعيشها سعيد
و إوعاك تحسب ياللي إنته مشيت
إن أنا بايع
أنا عمري ما أبيع
ده إن يوم حسيت إنك ضايع
أو تهت في سكه وقلت يا ريت
إندهلي وقولي إستناني
إنده صدقني هتلقاني
وهلملم حزنك من تاني
وأخدك للسكه في أحضاني
مش ناسي إن أنا وياك حسيت
روحي في حضنك
ياللي إنته مشيت

مش هتكلـــــم .

مش هتكلم
مش هتكلم ردي عليكي هيبقي سكوت
مش هتألم
رغم ان أنا حبيتك موت
بس أهي مره
و مش هتكلم
أنا هتعلم
والايام دي اكيد هتفوت
زي ما فاتت ايام تانيه
زي الحلم ما بقي مكبوت
***
مش هتكلم
ولا يوم هسأل
ليه بتبكي الحلم في لحظه ؟
بعد ما كان جاي ومبسوط
مش هتكلم
ولا هستسلم
باب الحلم هسيبه موارب
عمر الحلم ما يوم هيموت
***
أيوه بحبك
لسه بحبك
أيوه بقولها بعلو الصوت
عايش بيكي
وليكي
ولكن
أنا من غيرك مش راح اموت .