تخاريف بلياتشـــــو

لو عاوز تضحك ,,, ضحكنا
لو عاوز تبكي ,,, بكينا
لو عاوز فلسفه ,,, إتفلسف
لو ناوي تضحي ,,, عشينا
لو ناوي تنام ,,, إبقي اتغطي
لو صاحي ,,, إوعي تصحينا
لو فايق ,,, إبعد مـ السكه
دي السكه طويله ,,, ومش لينا
لو عاوز تضحك ,,, ضحكنا
لو عاوز تبكي ,,, بكينا
لو كده مرتاح ,,, لما تفضفض
فضفض بس إوعي ,,, تسهينا
عيط لو حابب ,,, اتفضل
ال يعني البكي ,,, صعب علينا
لو عاوز تضحك ,,, ضحكنا
لو عاوز تبكي ,,, بكينا
لو ناوي تهيس ,,, ع الشبكه
هيس بس إوعي ,,, تيجي علينا
اصل التهييس ,,, ساعه كويس
وسعات يجرحنا ,,, ويئـذينا
لو عاوز تضحك ,,, ضحكنا
لو عاوز تبكي ,,, بكينا
لو فاضي قرب ,,, خد كرسي
مشاريبك ,,, كلها عند أخينا
مهو جاب مبروك ,,, عقبال عندك
مبروك ,,, كان غايب وناسينا
لو عاوز تضحك ,,, ضحكنا
لو عاوز تبكي ,,, بكينا
لو جاي تتفرج ,,, اتفرج
لو جاي تتكلم ,,, سلينا
لو ناوي ترخم ,,, ما ترخم
مش إنته لوحدك ,,, يا أخينا
لو عاوز تضحك ,,, ضحكنا
لو عاوز تبكي ,,, بكينا
لو فاكر إنك ,,, بلياتشو
كلنا بلياتشو ,,, يا أخينا
.

و رجعت تانـي

 

ورجِعت تاني لسكتي
و قفلت باب الذكريات
رجِعت بسبق خطوتي
و رجَّعت دقات الساعات
فاتح دراعي لدنيتي
ونسيت خلاص كل اللي فات


الحزن كان ... ما خلاص ده كان
و الخوف كمان ... مـخلوق جبان
والفرح راح ... يملي المكان
واللي إتنسي ... راح فــ الزمان
و رجعت بضحك عــ اللي فات
ورميت وري ضهري السنين
ونسيت حجات متبعتره
و هربت من الأه والأنين
وناديت علي الضحكه بسكات

الوهم يمكن ... كان قدر
والحلم يمكن ... راح هدر
و الذنب ... ذنب لا يغتفر
لكن خلاص ... ما الجاني مات

ورجعت تاني لسكتي
و قفلت باب الذكريات
رجعت بسبق خطوتي
و رجعت دقات الساعات
فاتح دراعي لدنيتي
ونسيت خلاص كل اللي فات
.