مين فينا ما له ذنوب ؟

رسـائـل عـاشـــق

أنا قلبي مدبوح
غرقان و بينوح
وانتي الهوي
إنتي سفينة نوح
والموج بيعلي
ويعلي
و لفين أنا هروح ؟
فايتاني بس لمين ؟
دنا عشقي م الروح
بس مجروح
وكتير داريت
لكني عاشق
و بعشقي مفضوح
و مهما أداري
بيبان في نن العين
و مهما أنا أخبي
بيبان في نن الروح

أنا قلبي بيدوب
و الصبر مطلوب
و لاجل خاطرك
راح ابقي أيوب
و تـّني صابر
ده صبري
كفاره لذنوب
و مهما طال البين
عن عشقي مش راح أتوب
غالب يا مغلوب
الصبر حيله
لعاشق
و أنا عشقي مكتوب
فـ إن كنت عاشق
قولها وبلاش البين
محناش ملايكه
مين فينا ما له ذنوب ؟

.

يا تـَـّـكوينــي وحشتينـــي

يا وحدانيه كيف حالك ؟
وحشتيني
و كيف طيرك وترحالك ؟
وحشتيني
يا طايره و إنتي ما فـ بالك
وحشتيني
بلهفه و شوق بقولهالك
و حشتيني
و حشتيني
***
مغبتيش لحظه عن بالي
حقيقه و ساكنه في خيالي
و أشوفك طايره في العالي
أنادي و أقول
وحشتيني
و أقول إسمك بصوت عالي
فــ ترقص لاّجله أحبالي
و أنادي و صوتي يحلالي
يروح الصوت
و لا تجيني
لكن جوايا يسريني
أمل فرحان و يحييني
ما أنا واللهي يكفيني
أقول إسمك
فـ يطربني
و يشجيني
***
يا رُبان السما طاير
تعديني
يا رُبان بص علي البوصله
تلاقيني
يا رُبان الرياح بتقول
هنا تجيني
يا رُبان المطر بيقول
هنا تجيني
طب إغلط مره
وتجيني
و هاتلي حبيبي
نور عيني
هانسيه اللي عدي و فات
و أنسيني
***
يا راكبين الهوا وياه
أمانه عليكوا لــ يجيني
قولوله
إني مشتاق له
و ساكت
لاّجل ما أسمع له
و روحي
تروح و ترجع له
غيابه يا ناس
علي عيني
***
يا طايره و إنتي ما فـ بالك
بلهفه و شوق بقولهالك
و نار الشوق
بـِ تكويني
و حشتيني
يا تـَّـكويني
.

أنــا و الفـــرح متعانديــــــن

الضاحك الباكي 

في ناس الضحك
يربكهُم
و ناس الضحك
يهلـكهُم
و ناس الضحك
يشبـُكهُم
وناس الضحك
مسلكهُم
و ناس تضحك
عشان تهرب من الأحزان
و ناس تانيه متضحكشي
و لو أراجوز
يضحكهُم
و ناس لضحكها بتسرق
وناس تضحك عشان تحرق
و ناس من ضحكها بـِتـّشرق
تخاف وتقول لعله خير
فتكتم ضحكها و تقلق
***
و ناس الدمع
قصتها
و ناس الدمع
غيتها
و ناس الدمع
سكتها
و ناس الدمع
لعبتها
و ناس تِدمع
عشان ترتاح من الأحزان
و ناس تانيه متِدمَعشي
و لو هتموت
بحسرتها
و ناس وخده علي الأحزان
و ناس عايشه علي الأحزان
و ناس جنتهم الأحزان
و ناس الفرح لو زارهم
يقولوُا غلطت في العنوان
***
سعات أضحك علي روحي
و أحاول إني
أتبسم
تنُط في وشي تكشيره
و أحزاني تدوب غيره
من الأفراح
فأدوب حيره
و للتكشيره
أستسلم
كتير جربت إني أضحك
و م الأحزان أكون خالي
و أعيش حالي
و أنسي إني حد حزين
فـــ ألاقي الفرح يرميني
من العالي
لسبع أراضين
بقيت للفرح مـّتطمنش
و حرمت إني يوم أفرح
و تلقي الفرح لو شافني
يروح من سكتي
و يهرب
و أنا مبقتش أتعجب
ولا أستغرب
ما أنا و إنته
خلاص يا فرح
متخاصمين
***
زمان قالوا إللي بيعاند
بيتعاند
فتلقاني
أنا وألفرح متعاندين
و متعاهدين
ما نتواعد
و نتباعد
و أنا من طبعي ماستسلمش
و برضوا ألفرح ماستسلمش
ولا غلطه في يوم جاني


أنا في الدنيا
وحداني
و تلقاني
تملي حزين
و ده عادي
ما أنا و أحزاني
متصاحبين
و متفاهمين
و متعاهدين
و متفقين
ما نتباعد
مهي الأفراح في وسط ألحزن
لا بتقتل
و لا تموُّت
يجوز بيها الدموع هـتفوت
تنسيك أي شيء مكبوت
لكن بالعكس
لو فرحان و زارك حزن
يجوز من فجأة الأحزان
قلوب هتموت


فـأنا قررت إني أحزن
و ألملم فيا أحزاني
و من أحزاني
مش راح أموت


.

قصـيـدة الـزمـن الحمـــــــــــار

أقوله يـ شي
ما بيـــ شيشي
أقوله إمشي
ما يمــ شيشي
وبعد كلام
أقوله تمام
يقولي تمام
فــ أشد لجام
يفوتني أوام
يروح وينام
و أنادي عليه
ما بيجيشي
زمن غدار
زمن دوار
زمانا حمار
و ليه يا حمار
أقولك شي
ما بتــ شيشي ؟

أقوله يــ ييس
ما يــ ييسش
و أحايل فيه
ما بيحسش
أّسـُـك الباب
يفـُط
ينـُط
م الشيشي
زمن غلاب
و غاوي عذاب
و مهما تنادي
مايجيشي
زمن غدار
زمن دوار
زمانا حمار
و ليه يا حمار
أنادي عليك
ما بتجيشي ؟
و أقولك شي
ما بتــ شيشي ؟



.

بائــع الاقنعـــه

هنا تباع أقنعه و ضمائر مـُـستهلكه

يا عم يا عم يا بياع
ده لو ممكن تشوفلي قناع
قناع خداع
يرجعني الزمن تاني
و أخش الدنيا بيه تاني
و أعيشها ضياع
مفيش أوجاع
أبيع و أتباع
و لا يألمني شيء تاني


يا عم يا عم إيه هيصير
ده لو ينفع تشوفلي ضمير
مقاسه كبير
ضمير لــّـكن ضمير مشلول
يكون عايش لكن مقتول
ضمير شرير
يكونلي أسير
مالوش في الخير
و ما يألمني شيء تاني


يا عم يا عم ليه مبسوط ؟
دنا جوايا شيء مكبوت
و والله بموت
مدواي النار بحرقه نار ؟!
كفايه عذاب كفايه مرار
في حلقي الصوت
ما راضي يفوت
صـُراخي سكوت
فــ  ليه تألمني ليه تاني ؟
.

لو قـُـلت أّه راح أخسـرك

.


يا قلبي لسه بحذرك
و بخيرك
إبعد
بلاش يوم أخسرك
و بلاش تنادي الحب يوم
ده لو ناديته يجرجرك
و يسهرك
بص في وشوش المجروحين
تلقي العذاب شيء مُـشترك
لو رُقت ويا الحب يوم
ده ألف يوم هيعكرك
و يوترك
و إن يوم رسيت في الحب يوم
أيام كتير هيتوهك
ويحيرك
ده الحب دوامه ومتاهه
و في المتاهه هيعصرك
لو كنت في الحب الملك
مملوكك اللي هيأمرك
و إن كنت ناسي
أفكرك
الحب كاس مـُر و مرار
لو دُقت منه هَيـِسكِرك
و هيسحرك
تلمح خياله كأنه طيف
تنده عليه 
ما يعبـّرك
تروحله جري
يمسمـّرك
و إن مره شـُـفت الحب شُّوف
يفضل يا عيني
يمشـّورك
ويقولك إيه كان أخّـرك ؟
و فـ النهايه
هيهجُـرك
ويجيب عاليك واطيك في يوم
و تحس إنه بيكسرك
و بيجذُرك
يا قلبي إيه اللي مصبرك ؟
أو حتي مين كان أجبرك ؟
يا قلبي قول للحب لا
و إن قلت اّه
راح أخسرك






.