ضِحكتك سُكــر

حبيبتي لو تضحكي
الفجر  يتكلم
والليل  هيتعلم
... ...و يقول غزل فيكي

بس إنتي بس إضحكي 

والحزن  راح ينزال
يهرب  يفوت أميال
و الكون يقول موال
... ... لو يضحكوا عنيكي

عارفه إنتي لو تضحكي

شمس النهار هتغير
و قمر الليالي أسير
حتي النسيم هيطير
... ... ويحط في إيديكي

بس إنتي بس إضحكي

يا ضحكه ولاده
طراحه بالسكر
ومسكره زياده
... مهي ضحكتك سـُكر

اّاّاّاّّه بس لو تضحكي

قبل الزمان بزمان
للضحكه دي عطشان
فـ إضحك ياعمري عشان
... من ضحكتِك أّسكر

.

و إيه المانـــــع !؟

و إيه المانع ؟
يصاحبني بطول الليل
ألم واجع
ده لو نافع
أموت فيكي
وعشان خاطرك
مفيش مانع

و لما أسأل
و أقوله يا قلبي إيه الدافع ؟
وليه شاري اللي فيك بايع ؟
وليه بتنادي في المواويل ؟
لقلب أصم مش سامع
يرد القلب و يدافع
ونبرة مــُـر فيه لاذع
يرد يقول
و إيه المانع ؟

في دوامه
يا قلبي رميت معاك روحي
وقلت لــ روحي ليه روحي
و لو غرقانه في جروحي
بلاش بالسر ده تبوحي
و لو أخر نفس طالع

ولما أسأل و إيه الدافع ؟
يرد القلب و يدافع
ونبرة مــُـر فيه لاذع
يرد يقول
و إيه المانع ؟

ده أنا ياما
بحايل فيه و أقوله إرجع
أقوله السكه دي بتوجع
و أنادي يا قلب بس إسمع
ده رابع مستحيل يرجع
يقول عن حبه مش راجع

ولما أسأل و إيه الدافع ؟
يرد القلب و يدافع
ونبرة مــُـر فيه لاذع
يرد يقول
و إيه المانع ؟

كتير ياما
ضلوعي تحاوطه ما يعدي
و أعصر فيه بكفوف يدي
يقولي ده شيء مـَـهو بيدي
و يعـّـلي بــ نبضه ما يهدي
و يصرخ فيا و ينازع

ولما أسأل و إيه الدافع ؟
يرد القلب و يدافع
ونبرة مــُـر فيه لاذع
يرد يقول
و إيه المانـــــع  !؟


.

بنتبـاعــد ... و نرجع تاني نتـواعــد

بنتباعد
و نحلف يوم ما نتواعد
و نمشي نشد مطارحنا
و دمع عيونا يفضحنا
خيوط حكايتنا تلمحنا
فـ ننسي حجات بتجرحنا
و نـُـشبك ذكري تفرحنا
فــ نرجع تاني نتواعد
و نتعاهد
ما نتباعد
و أدينا سنين أنا وإنتي علي ده الحال
بنتباعد
و نرجع تاني نتواعد


بــ نتواعد عشان عاشقين
قلوب صافيين
و أحلامنا لفوق طايرين
يجوز تايهين
بنبعد
بس مش عايزين
أنا و إنتي كما الورده بتحضن طين
في دنيتنا اللي سحبانا
بنسبق ضحكه سابقانا
و ننده سكه سايبانا
و لو خطاوينا يوم باعدت
بدون مواعيد بنتعاهد
فـ نتواعد


و نتباعد عشان خايفين
و مش فاهمين
ده خوف من مين
يجوز قادرين
نقرب
بس مش عارفين
مهو إحنا يا قلبي مش شايفين
لفين السكه وخدانا
و إيه أخرتها ويانا
و فيه سكينه سارقانا
و لما قلوبنا تندهنا
نلاقي السكه بتعاند
فـ نتباعد
و أقولك إيه ؟
و أعدلك إيه ؟
ما أنا وإنتي بقالنا سنين علي ده الحال
بنتباعد
و نرجع تاني نتواعد


.

بحبك و السما تشهد بحبك ليه

هقولك إيه ؟
و أعدلك إيه ؟
يا بنت الإيه
بحبك
بس مش عارف بحبك ليه !

يـجوز يعني
عشان عينك بتسحرني
و فيها كلام محيرني
و ليها الشوق يجرجرني
و يجبرني
أقولك ع اللي سهرني
بحبك
بس مش عارف بحبك ليه !

يجوز يعني
عشان شعرك تملي يطير
ويعمل قلبي طياره ورق بتطير
محلق فوق سما سابعه لكنه أسير
بدون تإثير
يا بنت الإيه تعبتيني من التفكير
و بحبك  
بس مش عارف بحبك ليه !

يجوز يعني
عشان ضحكة سما صافيه
و بسمة شوق جميل دافيه
و للمجروح كما البلسم تكون شافيه
بدون عافيه
بحبك بس ... مش كافيه
بحبك
بس مش عارف بحبك ليه !

بحبك و الرموش سارحه
بحبك و الخدود طارحه
بحبك حتي لو جارحه
بحبك يا أغلي مـ الفرحه
وفـ الأخر هقولك إيه
بحبك
لاء بدوب فيكي
عشان قلبك يا بنت الإيه
بحبك
و السما تشهد بحبك ليه
.