بيــــان نمــره واحـــد

بيان نمره واحد

عزيزي المواطن
بيان من مناضل
لأخوه المناضل
و إخته اللي هتفت بميت ألف راجل
في بحري و قبلي و مدن السواحل
في سينا و طنطا و كل الـقـبـايــل
سويسي و صعيدي و فلاح و عامل
موظف و طالب و شغال و عاطل
و متهان في بلده فـقرر يناضل

عزيزي المواطن
أنا إسمي خالد
و أحمد و كامل
و حنا و يوحنا
و محمود و ناشد
و مش فارقه إسمي
ولا فارقه سني
مهو الكل واحد

عزيزي المواطن
يا شارب في ذُلك
و كاتم في غـِلك
و غيرك مطنش
و حالف يذلك

عزيزي المواطن
يا سادد ودانك
و قاعد في حالك
و مستني تفرج
و ساكت مكانك

عزيزي المواطن
شبعنا إهانه
و ضرب و مهانه
و ذل و مذله
في أرض الكنانه

عزيزي المواطن
يا قاعد تشيت
و غيرك مبيت
و حالف لا يرجع
يا منصور يا ميت

عزيزي المواطن
رصاصهم مطاطي
بيخبط في باطي
و مهما هيحصل
أنا مش هطاطي

عزيزي المواطن
شبابنا  قالوها
و رجعوا وعادوها
عداله عداله
يا ريت يسمعوها

عزيزي المواطن
هـ ييجي يراضيك
فـ فتح عنيك
و إوعاك تصدق
هيضحك عليك

عزيزي المواطن
يا سامع و شايف و قافل عنيك
بنكتب تاريخنا وبـ ننادي فيك
بلاش التردد و خليك رجوله
و قرب و شـّـبك إيديا في إيديك

يا رب إنته سامع
في كل الجوامع
أكم عبد خاشع
بيدعيك تدافع
و تنصر شبابنا
اللي رايح و راجع

.

يــّـما خايف يوم تنادي ... ما تلاقيني .

يــّـما ليه حضنك معادشي
بيساعيني
يــّـما ليه قربك معادشي
بيواسيني
يــّـما ليه الغُلب فيكي كل يوم
ييجي يرازيني
هوه إيه اللي بيجري بس يــّـما
... فهميني

يــّـما إيه بس اللي حاصل ؟
و إللي حالك ليه مواصل ؟
كل يوم بنزيد فواصل
يــّـما مش قادرين نواصل
يــّـما بينا سور بيعلي
و البعاد بقي حد فاصل

يــّـما فيكي الظلم عايش
و بحوافر إيده نــّـابش
للي سارق وإٌللي هابش
وإللي مالي جيوبه كابش
و إللي يوم بالحق ينطق
إيديه راح تلبس غوايش !

يــّـما مات صوت الحناجر
لما زاد طعن الخناجر
م اللي ظالم واللي فاجر
يــّـما طيرك راح و هاجر
بعد ما إتقصقص جناحه
خاف لا يرموه في المحاجر

يــّـما ليه كتر الولاد
أصبح مصيبه ؟
يــّـما دول عده وعتاد
دول ليكي هيبه
يــّـما زاد فيكي الفساد
و الكدب خيبه
جوه حضنك ... بس نشعر إننا
في بلاد غريبه ؟
و الله يا يــّـما ... دي تبقي عيبه

يــّـما فينك ؟ ... كلميني
و بحنانك حسيسيني
يــّـما ليه بس تسيبيني ؟
يــّـما قلبك ليه راميني ؟
و ليه ناسيني ؟
يــّـما خايف يوم تنادي
ما تلاقيني .
.

رســــالــة إلــي الــوالـــــــي

اللهّم ولي من يصلح

و حقيقي  يـا رب تـِـكمل علي خير و بالعمــــار

بالإنبهار ... من مصري جار
من ألف حاره و ألف دار
مبروك عليكم الإنتصار
و يا رب تـِـكمل بالعمار
... من قلبي بدعيه يحـُـرسك

يا شعب ثار
و بحـُُرقه نار
بعد الحصار
أخد القرار
... و بقلبه خش المـُعترك
الظلم غار
و كأنه فار
شاف قط طار
قالك فرار
... و قال راح أهرب لا إتمـِسك
راح ع المطار
بــ النعـش طار
دار في المدار
بلغ فرار
... م الخوف دموعك تخِـرسك
حالة دمار
خوف و إنهيار
رعب و مرار
و كأنه زار
... هربان و خوفك يحـِبسك
و أهو لف دار
دار ليل نهار
لاجيء و دار
يطلب يـُـجار
... فـ الخـوجه قال صعب أحرُسك
من تاني طار
غير مسار
من ده المطار
للتاني زار
م الإنتظار
جاله الدوار
... من كتر ما لف السِكك
و أهوه ده اللي صار
بالإختيار
فجأة الكبار
قصدي اللي فاكرينهم كبار
يبقوا صغار
لو عاّشوا عار
وإن ماّتوا عار
... إخس اللي سمـّـاك يوم ملك

.

(( اللهّـُم لا شماته ))

مـــــات المــلك ... عـــــاش المــلك

هلوسـه X  هلوسـه  =  22  - 1    و البقيه ستأتـــــي

مات الملك
عاش الملك
و الحاشيه يبكوا ... و يضحكوا
شايلين تابوت بيعيطوا
... مات الملك
متشعلقين في الكرسي كانوا بيهتفوا
و بيهللوا
... عاش الملك
و الدايره بتدور عكسنا
و السكه ضد الإتجاه
عم الفساد
كل البلاد
و الهزل ساد
و الـغـِـل زاد
*** *** ***
مات الملك
عاش الملك
و أنا و إنته ليه مش دريانين ؟
جوانا ديما" محبوسين
و كأِننا مش محسوبين
و لا محسوسين
كما لو نكون أحجار صنم
... من صغرنا
الدرس كان بيقولنا
إقفل عنيك ... و إياك تشوف
ربع إيديك ... و إوعاك تقول
هوه إحنا فين
واللي إحنا مين
أحسن نكون بين البينين
تتباع في يوم لو ليك تمن
*** *** ***
مات الملك
عاش الملك
و الليل يروح يبعت في ليل
الليل هجم
الليل سواده إسود قـِـتم
و الأرض خاصمت شمسها
و الشمس لسه فـ عّـِندها
و لا راضيه تشرق أرضها
راحت و هربت للعدم
و تراب بيشرب ذُلهـا
و الطين بيرفض بذرها
و الساقيه دايره لعكسها
و الخوف بيطرح في الألم
*** *** ***
مات الملك
عاش الملك
و الحمل ليه عمال يزيد ؟
يوم بعد يوم رافض يخف
فــ الساقيه من كتر الحمول
حلفت و قالت مش هـَـلف
و البير ندا
رد الصدا
فــ البير زعق قرر ... يجف
و الأرض ينشف نهرها
و الزين بيشرب مـُرها
مقدرش يدفع مهرها
سكتت طبول كانت تزف
*** *** ***
مات الملك
عاش الملك
و الحاشيه لبست صيادين
متربصين
ناصبين شبك
مستنيين
و الطـُعم زاد
فـ الرزق قال للصيادين
البحر ده مش بحركم
و لا دي البلاد
مش ده المكان و لا ده المعاد
الصيادين ساقوا العناد
فـ الرزق قال للبحر إحضن فـ السمك
و إياك تفرط فـ الولاد
فــ الصيادين زادوا العناد
شدوا الشبك
و الحبل يخنق في السمك
و الصيادين الطماعين
مش دريانين
بيشدوا أكتر فـ الشبك
و بحـُـرقه كانت في إزدياد
هاج الولاد
غـِـل و عناد
... هاج السمك ع الصيادين
و البحر هاج
و الموج عـِـّـلي
و البرد ... قـاد
... مات الملك
... .... عاش الملك
و الحاشيه كانت ... قـــوم عــاد
.

إبتــدأ الـدرس يـا غبـــي

مجـرد و جهـة نظـر

 

الكل قام هب إنزعج
علق صور فوق الجدار
ورقه و قلم نكتب كلام
قمه و غايه في الإنبهار
نرفع شعار
عاش الهلال ويا الصليب
نشجب نندد للدمار
و أخينا قال
جرجس ده صحبي و بعزمه
مره في سحور
مره في فطار
و التاني قال
أحمد ده أخويا
ده جه و حضر إكليل يوحنا
و للـعدرا زار
***
يا معلقين فوق الجدار
صورة صليب وسط الهلال
و بتهتفوا و الحـُـرقه نار
و بصوت قوي يهز الجبال
الغاغه قامت و إنتهت
و مفيش قرار
الغاغه مش حل فــ وطن
عايش ضعيف
وسط الحصار
أو لما يزهق
بيحل مشكلته بــ فرار
فـ الحل كان حبة هتاف
حبة صور
كلمه و شعار
الحل كان هوه الفرار
و رجعنا تاني لهمنا
و رجعنا تاني لضعفنا
و رجعنا تاني لهمسنا
نهمس بطعم الإنكسار
و الهمس شيء من طبعنا
كما غول بيجري في دمنا
مش ناوي يخرج مننا
و ده شيء طبيعي لإننا
أحمد و جرجس من زمان
شاربين سوي نفس المرار
شاربين مرار نفس الوطن
دايقين فـ نار نفس المحن
دافعين سوي نفس التمن
واكلين فـُـتات خير الوطن
قاسمين رغيف طرح الوطن
لو طالوا يفدوه بالبدن
وطني اللي صامد من زمن
أعجب ما فيك إنك وطن
واقف في وش الإنهيار
و أعجب ما فينا أهل الوطن
نضحك في عز الإنكسار
يا معلقين كل الصور فوق الجدار
الحل مش خانة ديانه
ما كلنا في نفس المهانه
مستنيين الإنفجار
و الحل مش أشكال صور
الحل مش كلمه و شعار
الحل يوم ما يكون لنا
و من حقنا ناخد قرار
و يكون قرارنا بالإختيار
.