دار مصــر أمـــــّـان

علقت شـِـعري في كل مكان
حتي الجدران
و الله ما خليت
وسمعت زغروطه إنطلقت
هزت رجت
أركان البيت
يا إخونا ده الفرحه جميله
و إحنا الليله
أصحاب البيت

علقت شـِـعري علي كتافي
ومشيت حافي
وبقول أشعار
وسط الميدان المتعافي
يا نسيم صافي
إحنا الأحرار
والفرحة حضنت أولادنا
و يا جدودنا
يحيا الثوار

علقت شـِـعري و مش هنسي
دم الشهدا
هما الخالدين
يا ورد فتح في جناين
زاهي و باين
كده يملي العين
بـ نبوس إيدين اللي جابتهم
م إحنا إخواتهم
اّه مش ناسيين

علقت شـِـعري و علي فكره
أنا من بكره
همسك فاسي
و أروح أخضر في صحاري
و أبني في داري
و أحضن ناسي
و هجري و يرفرف علمي
و أمسك قلمي
و أرفع راسي

علقت شـِـعري عشان ما أملك
ولا بتملك
غير الأشعار
يا مصر كان مهرك صوتي
و يجوز موتي
برصاصه و نار
ده يومها كان زادي هتافي
و جلدي لحافي
و القلب عمار

علقت شـِـعري عشان مصري
و أجدع مصري
ما إحنا الجدعان
يا مصري ده بلادك حره
و ده كام مره
إتقال في القراّن
بنقولها لبلاد الدنيا
مصر عفيه
دار مصر أمـّـان
.

عـشــان إنتــه مصـــري

قبل 25 يناير

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف



ل عم أحمد فؤاد نجم

بعد 25 يناير

عشان إنته مصري و عندك إراده
ودمك يا ولدي ده سكر زياده
وده طبع أهلك في ساعة الولاده
ورغم إن عيشتك كانت قهوه ساده
لكن برضوا حالف تعيشها بسعاده

عشان إنته مصري هتبدأ حياتك
تفكر في بكره وتنسي إللي فاتك
وتبدأ تتكتك و تظبط سعاتك
و خطوه في خطوه هتمشي في سراتك
و من تاني يرجع شموخ أهرماتك
ولازم عدوك يخاف من سكاتك

عشان إنته مصري فتعظيم سلام
لواد شاب عتره وراجل هـُمام
و بنوته حلوه في غاية التمام
وكهل و مـُسنه وطفل و غلام
و مهما راح أكتب ما يوفي الكلام

عشان إنته مصري وفيك من جدودك
و عمرك في لحظه ما تخلف وعودك
قدرت ببساطه تفوق من شرودك
يا شارب عزيمه و راضع صمودك
يا مالك مكانك و مالك حدودك

عشان إنته مصري ده فوق راسي أشيلك
وأديك ناوي ترجع وهتشد حيلك
وعينك مرايتك و قلبك دليلك
هتفتح طريقك وتسلك سبيلك
وتزرع في قمحك و ترسم في نيلك

عشان إنته مصري بترفع في راسك
و روحك في كفك و عارف خلاصك
كأنك معلم كده في وسط ناسك
يا حافظ تاريخك يا حافظ تراسك
و قلمك في إيدك وفي التانيه فاسك

عشان إنته مصري و دمك نزف
علي أرض طاهره وسال و إنجرف
بتحمي في تاريخك و تحمي التحف
و غيرك مطنش وعايش ترف
عشان إنته مصري ؟؟؟ يزيدك شرف
.

ماليــش فـي السياســه

ماليش في السياسه و شغل الغلاسه
ماليش في المزايده وكتر الكلام
وجودك قتلنا
حشيشك سطلنا
و قالوا و قلنا
هترحل أوام

ماليش في المناهده وشغل المعانده
ماليش في الكلاحه وشغل اليهود
دنا شعب صامد
و لو يوم تعاند
هنفضل نعاند
لايمكن تعود

ماليش في التباته و شغل الغتاته
ماليش في الملاوعه و لعب العيال
رحيلكم ضروري
يا واقفين في زوري
يا حابسين في نوري
وجودكم محال

ماليش في الخيانه يا خاين الامانه
ماليش في الأونطه و لعب الديول
فلوسنا وخدوها
بلدنا وباعوها
فقلنا هاتوها
طلقـّتوا الخيول

ماليش في التباحث و شغل المباحث
ماليش في المؤامره وشغل النـّــَور
يا أكبر عصابه
يا كل الديابه
ده حبة غلابه
سـّقوكوا العِـبر

ماليش في البجاحه و شغل التناحه
ماليش في البلاهه و شغل العبط
دي لاءه صريحه
و كانت فضيحه
يا أشكال قبيحه
وجودكم غلط

ماليش إلا صوتي يفجر سكوتي
ماليش إلا قوله في بحر الكلام
هنحضن ولادنا
ويزداد صمودنا
و ترجع بلدنا
ده قصر الكلام


.

لو مقتنع بكلامي و موافق إنشر لوجه الله .

كنت من الذين ضُربوا في جمعة الغضب و بعدما شاهدته اليوم من مؤامرات و بلطجه و إرهاب


و أيضا" بعد أن تبين لي أن المعارضه لا تفقه شيئا" هذا هو رائيي و لن أتنازل عنه


1 ) الرحيل الفوري لمبارك فور إنتهاء مدته بعد أن تعهد بعد الترشح برغم الشكوك حول تورطه ورجاله فيما يحدث الأن من بلطجه وإرهاب لأنه للأسف لا يوجد بديل كفء و موثوق به .

2 ) أن يشمل التعديل أيضا" الماده 88 من الدستور يتم من قبل خبراء الدستور وليس من قبل مجلس الشعب أو الشوري الغير موثوق فيهما وكذلك المواد 76 و 77 وأي مواد إخري تتراّءي لهم
3 ) التأكيد الفوري علي إلغاء قانون الطواريء .


4 ) إستقاله جميع أمناء الحزب الوطني بدون إستثناء و أولهم جمال مبارك و التأكيد علي عدم ترشيحه للرئاسه .


5 ) إذا لم يكن هناك حل دستوري يسمح بحل مجلسي الشعب و الشوري حتي لا يكون هناك فراغ سياسي

فلا مانع علي أن يكون وجوده مجرد وجود شكلي فقط حتي تتم الانتخابات في أقرب ما يكون علي أن تتولي لجنه من الحكماء و الذي يثق فيهم الشعب في إدراة شئون البلاد حتي الانتخابات .


6 ) محاسبه و متابعة ومحاكمه كل يثبت تورطه في أعمال ضد الشعب سواء قتل و إرهاب أو فساد و سوء إداره ولا يستثني في ذلك أحد سواء كان رئيس أو وزير أو أي شخص تثبت إدانته .

7 ) الإسراع في صياغه دستور جديد للبلاد من قبل خبراء الدستور شرط أن

يوافق عليه الشعب وذلك في خلال فتره انتقال السلطه .


8 ) إعطاء الفرصه للسيد أحمد شفيق فقط و مؤقتا" كرئيس للحكومه في تسيير شئونها حتي تتم إستعادة الثقه وحتي يقدم كل مرشح للرئاسه برنامجه الإنتخابي للشعب الذي أدرك قوته و أدرك الأن كيف تكون المطالبه بالحريه.


بالله عليكم ده مش وقت الحماسه و لا الأخذ  بالثأر ولا حتي وقت نتهم و نشتم فيه بعض
 ده وقت التفكير بعقل و نبطل نبص تحت رجلينا
إحنا في بيوتنا و الناس بتموت بعضها ,سواء مأجورين أو مؤيدين ضد معارضين.


لو مقتنع بكلامي و موافق إنشر لوجه الله .


.

بيــــان نمــره واحـــد

بيان نمره واحد

عزيزي المواطن
بيان من مناضل
لأخوه المناضل
و إخته اللي هتفت بميت ألف راجل
في بحري و قبلي و مدن السواحل
في سينا و طنطا و كل الـقـبـايــل
سويسي و صعيدي و فلاح و عامل
موظف و طالب و شغال و عاطل
و متهان في بلده فـقرر يناضل

عزيزي المواطن
أنا إسمي خالد
و أحمد و كامل
و حنا و يوحنا
و محمود و ناشد
و مش فارقه إسمي
ولا فارقه سني
مهو الكل واحد

عزيزي المواطن
يا شارب في ذُلك
و كاتم في غـِلك
و غيرك مطنش
و حالف يذلك

عزيزي المواطن
يا سادد ودانك
و قاعد في حالك
و مستني تفرج
و ساكت مكانك

عزيزي المواطن
شبعنا إهانه
و ضرب و مهانه
و ذل و مذله
في أرض الكنانه

عزيزي المواطن
يا قاعد تشيت
و غيرك مبيت
و حالف لا يرجع
يا منصور يا ميت

عزيزي المواطن
رصاصهم مطاطي
بيخبط في باطي
و مهما هيحصل
أنا مش هطاطي

عزيزي المواطن
شبابنا  قالوها
و رجعوا وعادوها
عداله عداله
يا ريت يسمعوها

عزيزي المواطن
هـ ييجي يراضيك
فـ فتح عنيك
و إوعاك تصدق
هيضحك عليك

عزيزي المواطن
يا سامع و شايف و قافل عنيك
بنكتب تاريخنا وبـ ننادي فيك
بلاش التردد و خليك رجوله
و قرب و شـّـبك إيديا في إيديك

يا رب إنته سامع
في كل الجوامع
أكم عبد خاشع
بيدعيك تدافع
و تنصر شبابنا
اللي رايح و راجع

.

يــّـما خايف يوم تنادي ... ما تلاقيني .

يــّـما ليه حضنك معادشي
بيساعيني
يــّـما ليه قربك معادشي
بيواسيني
يــّـما ليه الغُلب فيكي كل يوم
ييجي يرازيني
هوه إيه اللي بيجري بس يــّـما
... فهميني

يــّـما إيه بس اللي حاصل ؟
و إللي حالك ليه مواصل ؟
كل يوم بنزيد فواصل
يــّـما مش قادرين نواصل
يــّـما بينا سور بيعلي
و البعاد بقي حد فاصل

يــّـما فيكي الظلم عايش
و بحوافر إيده نــّـابش
للي سارق وإٌللي هابش
وإللي مالي جيوبه كابش
و إللي يوم بالحق ينطق
إيديه راح تلبس غوايش !

يــّـما مات صوت الحناجر
لما زاد طعن الخناجر
م اللي ظالم واللي فاجر
يــّـما طيرك راح و هاجر
بعد ما إتقصقص جناحه
خاف لا يرموه في المحاجر

يــّـما ليه كتر الولاد
أصبح مصيبه ؟
يــّـما دول عده وعتاد
دول ليكي هيبه
يــّـما زاد فيكي الفساد
و الكدب خيبه
جوه حضنك ... بس نشعر إننا
في بلاد غريبه ؟
و الله يا يــّـما ... دي تبقي عيبه

يــّـما فينك ؟ ... كلميني
و بحنانك حسيسيني
يــّـما ليه بس تسيبيني ؟
يــّـما قلبك ليه راميني ؟
و ليه ناسيني ؟
يــّـما خايف يوم تنادي
ما تلاقيني .
.

رســــالــة إلــي الــوالـــــــي

اللهّم ولي من يصلح

و حقيقي  يـا رب تـِـكمل علي خير و بالعمــــار

بالإنبهار ... من مصري جار
من ألف حاره و ألف دار
مبروك عليكم الإنتصار
و يا رب تـِـكمل بالعمار
... من قلبي بدعيه يحـُـرسك

يا شعب ثار
و بحـُُرقه نار
بعد الحصار
أخد القرار
... و بقلبه خش المـُعترك
الظلم غار
و كأنه فار
شاف قط طار
قالك فرار
... و قال راح أهرب لا إتمـِسك
راح ع المطار
بــ النعـش طار
دار في المدار
بلغ فرار
... م الخوف دموعك تخِـرسك
حالة دمار
خوف و إنهيار
رعب و مرار
و كأنه زار
... هربان و خوفك يحـِبسك
و أهو لف دار
دار ليل نهار
لاجيء و دار
يطلب يـُـجار
... فـ الخـوجه قال صعب أحرُسك
من تاني طار
غير مسار
من ده المطار
للتاني زار
م الإنتظار
جاله الدوار
... من كتر ما لف السِكك
و أهوه ده اللي صار
بالإختيار
فجأة الكبار
قصدي اللي فاكرينهم كبار
يبقوا صغار
لو عاّشوا عار
وإن ماّتوا عار
... إخس اللي سمـّـاك يوم ملك

.

(( اللهّـُم لا شماته ))