يا رب يارب يارب
انا من تراب
والإرادة هى سرك فيه
تنوره بحكمتك
وبرحمتك تهديه
تراب وسرك
اذا مس التراب يحييه
إلهمنى حب الخير
حب الجمال والحق
خلينى اقول للشيطان
مهما غوانى لاء
علمنى أثبت ولو زال
الجبل وانشق
الهمنى يااارب علمنى
يارب يارب
سبحاانك
في يوم كده من ذوات الأيام و كهيك لسه مخلصشي لقيت الدنيا بـ تمطر و ع المطره مقولكشي و أنا واحد يا ناس مجنون يشوف أمطار يقوم يمشي و لما لقيتها بتمطر فـ قلت يا واد نقوم نمشي فقمت لبست و إتمنجهت ضربت الجينز و الكوتشي فـ رجليا قالت علي فين ؟ زغرتلها بعين و بعين و قلتلها متسألشي نزلت و رجلي وخداني كده وماشيين و مش عارفين لفين رايحين ... متفرقشي دي ناس رايحه وناس جايه و انا ماشي لوحديه بطرطش رجلي في الميه و فارد في الهوا إيديا و طاير فوق سما الدنيا
و عدي الوقت و أنا ماشي و أنا مبسوط كده و فرحان في مره أجري في مره أرقص و أغني كمان ...
و فاتت ساعه لاء فاتت كمان ساعتين ...
بــ بص لقيتني جنب النيل فقمت ضحكت عليه سلمت فـ رد و قاللي كيف حالك ؟ تعالي إقعد فــ قمت قعدت و لسه يا دوب و أنا بقعد بـ بص لمحت ... لمحت في موجه تتسحب تبوس الشط فــ ييجي الشط يحضنها فــ تستعبط و تهرب منه تتدحلب فــ يتلخبط و بعد شويه ترجعله فــ يتشعبط تقوم من حضنه تتسرسب فــ يتسلبط تطلعله الموجه لسانها فــ يتعفرط و أنا جنبه وعليه بضحك و بتنطط ...
و بعد شويه قمت سرحت و قلت في بالي لو تفضل كده تمطر ده تبقي يا ناس عنب جدا و لوز و أكتر لكن ده الوقت متأخر و أنا رجلي يا دوب تقدر تروحني و تتجرجر و فـ السكه يا رب إستر فـ قمت وقفت و إستأذنت فـ قال بدري فـ قلتله يوم هنتقابل ... ما هو مقـّـدر عليه سلمت حضنته بعيني ما إتكلمت و لما ببوسه في جبينه لقيتني لمحت في حبات المطر نازله علي الميه فـ تاني سرحت و قمت رسمـت ... بـ حبات المطر قلبــي و بيها كتبت ... بداية حرف من إسمي ... و حرفها تحـت
أنا عارفه ده من صغره و متعود علي الأحلام و ديما كان يقول هـَقدر و ياّما حكالي عن أحلامه زمان و إحنا سوي بنسهر ده جاّلي في يوم و كنا صغار و قبل الفجر ما يكـّبر ضحكلي و قال ده لما أكبر و أشوف أحلامي بتزقزق و فجر الحلم بيشقشق راح أتذكر براءة طفل عوده أخضر زمان قـَرر و قال هـَقدر و لو هـَحفر و أفوت في الصخر و هـَغير أكيد هـَقدر أحقق حلم أنا حلمته و مش هقلق ولا هزهق ولا أتأثر ... ... ... وبعد سنين سنين تانيين سنين و سنين قابلته صدفه مش أكتر لقيته ماشي متدهور و حاله يا عيني كان أغبر ساعتها قمت أنا مفكر و قلت أهرب لا يتأثر ببص لقيته قدامي و بيسلم و مادد إيده ما إتكلم حضنت إيديه و خدته في حضني فـــ إتألم شويه لقيته قام ضاحك ضحكلي و عينه بتغرغر وحابس دمعه لا يمطر و قاللي وصوته متكسر أديني كبرت لكني كبرت ع الأحلام كبرت و حلمي لم يكبر فضل وحده فضل يصغر وخط سنيني أهوه بيقصر و قطر العمر بيفوتني و بيصفر لكن برضوا يجوز هـَقدر و أديك لســّاك يا طفل تقول يجوز هـَقدر فـ بص بكل عند و قال يجوز هـَقدر يجوز أقدر برغم أنه جدار أحلامي متشقق و رغم أنه شراع أحلامي أنا بيغرق و رغم إنه مفيش أحلام بتحقق وساعة حظي عطلانه لا بتقدم ....... ولا تأخر هروح و أضحك علي روحي و هقول أقدر مفيش قدامي غير إني يا إما أحلم ........... يا إما أحلم و أقول هـَقدر و هعمل إيه بكل غباء أنا مصدق بإن الحلم ... بـيصبر
خيول تعبت من الترحال في أرض الغربه ترويها و ناس تسأل في ألف سؤال مجاش و لا رد يهديها خلاص ده الكل بقي رحال بيوت فضيت و ناس فيها و أنا لوحدي في أرض الخوف
في أرض الخوف ... جدار مشروخ في بيت من طين و طمي في نيل ... مخاصم قمحه أديله سنين و قارب فر ... تاه ف البحر ... رماه الموج ما بين شطين رجع مكسور لأرض الخوف
في أرض الخوف ... رايات الصمت تتكلم و نبض وليد ... رضع م اليأس راح سلم بصوت مبحوح ... خلاص الروح ... نفض في عروقه فـ إستسلم عشان مولود في أرض الخوف
في أرض الخوف دموع مش قابله تطاوعني عشان مش راضيه توجعني و لو نزلت فـ إيه يعني ما أنا لوحدي في أرض الخوف
لمحته هناك بيضحكلي و بيقولي متزعلشي فتح درعاته وندهلي و قاللي تعالي متخافشي مشيت نواحيه مشيت خجلان مشيت و السكه ما بتمشي بجرجر رجل و التانيه بلم خطاوي محنيه مداري عيوني يإيديا لا تيجي عيونه في عنيا كطفل صغير كسر لعبه كسرها و هوه ملعبشي وقال هفرح فـمفرحشي فقرب مني و حضني وقام طبطب علي كتفي و كأنه بكفه شال همي و لملمني و باسلي جبيني طمني همس في وداني وشوشني و قال من تاني متخافشي متقلقشي متيأسشي أكم من قالوا مات في البحر و شالوا الموج و لاغرقشي و لو فرضا تغيب الشمس ده نور ربك مبيغبشي
.jpg)
.bmp)