الجمعة، 17 أكتوبر 2014

حـرريـنـــــــي






حرريني
حرريني من قيودي
حتي لو كان قيد حرير
إقطعي كل الخيوط
وإحلمي حلمي الكبير
هدي عش العنكبوت
حرريني و فوقيني من السكوت
وإكسري كل الحواجز
وإسرقيني من زماني
وإعبري بيا لسماكي
خرجيني من التابوت
***
وإرسمي الدنيا بعنيكي
دللي قلبي ع الطريق
***
حرريني
هزي في فروع الشجر
نادي فيا ع المطر
نادي فيا ع اللي كان
خرجيني من حدودهم
وإسرقيني من الزمان
حرريني من البشر
وإكتبي إسمك بنبضي
وإبني كل اللي اتهدم
داوي شيء فيا إنكسر
***
حرريني
وإندهي للشمس تشرق من جديد
حرريني
حرري كل العبيد
ردي عمري اللي اتسرق
رجعي كل اللي فات
إكتبيلي في ذكريات
وإكتبيها من جديد
ضمي قلبي بين ايديكي
يعلي نبضه ويناديكي
يصحي لو شريانه مات
***
حرريني
ضمي فيا بجناحاتك
رفرفي فوق الأنين
عدي بيا م السنين
وإشفي ليلي من جراحه
وإشطبي فيا الحزين
***
حرريني
وإبدري فيا الحياة
يرتوي عمري اللي تاه
خضري فيا بعيونك
وإرسمي البسمة بشفايفك
وإحدفيلي طوق نجاة
***
حرريني
قلبي محتاجلك حبيبتي
قلبي محتاجلك حقيقتي
قلبي محتاج طوق نجاة
فـ حريريني

الخميس، 2 فبراير 2012

جـبت الكفــن يا أمــا





جـبت الكفــن يا أمــا
و أديني بستني
 لأحسن يفوت دوري
...
و الموت مالهش  أمان

ده الموت صبح غمــــه
  بالزوفه
  باللمه
 بعيال و من دوري
...
و  أنا قلت  أموت كسبان

زعلانه ليـــه  يا أما ؟
وبتبكــي ليـــه  يا أما ؟
وبتسرحــي  أوقات ؟

يا أما اللي مات ... ميت
  حتي اللي عايش مات
  بس اللي مات ... ميت
 صرفولوا بالألوفات

  فمتحزنيش يا أما
لو غبت بكره بعيد
  بكره اللي جاي فكره
 من غيري جايه  أكيد
و متقلقيش  همــا
 هيقولوا عني شهيد
 ومتزعليش يا أما
و إبقى إصرفي التعويض
.

الأحد، 15 يناير 2012

إرجعــــــي







بصرخ وأقـــــــــول راح
..................... تسمعي
و لـ حضن قلبـــــــــي
.................... هترجعي
وإن كنتي حتــــــــي
..................... هتدمعي
أهون ما تمشـــــــي
..................... تودعـــي 


... بس إسمعي ... 


لو كان سكوتــــــــــــي
...................... يرجعـــك 

هسكت خـــــــــــــلاص
..................... وهـَرجعـك

وإن كان كلامـــــــــــــي
...................... يضيعـــك

هسكت عشان نفسي
...................... أسمعـك

 
... بس إسمعي ...

جوه السكـــات
............... إشتقتلك
.......................و ندهتلك
...............................و بعتلك
مرسال بقلبي
................وقــٌـلت
ـلك
مستني تيجي
.......... و أسمعك

................ أو تسمعــــــي

.

السبت، 17 ديسمبر 2011

إقفلوا كتاب التاريخ

.



.

إقفلوا  كتاب التاريخ

بإعتذار للذكريات

إعتذار واضح صريح

و إنسحاب للأمنيات

و إملوا قلب الكون صريخ

 إرفعوا لليل رايات

وإرحموا ضهر الخيول

و إنزلوا وحـّـنـوا الرجول

و إدفنوا كلمة إصول

إرحلوا بكل اللغات

 جمعوا كل الولاد

و إلبسوا لون السواد

و إعلنوا دهرين حداد

ده الشريف بس اللي مات

 داروا عينكم م الكسوف

  و إرفعوا كل الكفوف

 هيه ارجل من إلوف

 فـإستروا ست البنات

و إنصبوا وسط الميدان

100 صوان

 و 100 ضريح

الجريح  واقف جريح

والشهيد لساه جريح

وإحنا ليه رضعنا السكات

 إقفلوا ياللاه الكتاب

و الحساب يوم الحساب

الحساب يوم الحساب

إيد بتحرق  إسم مصر

إيد بتدبح  قلب مصر

إيد بتحرق وصف مصر

إيد  و عــّرت بنت مصر
.

الاثنين، 13 يونيو 2011

الـلـيــــــــــل

.

.

 

الليل مسجون و أسير سرداب
و نهار سجان واقف ع الباب
و ف إيده الشمس تقولشي صحاب
و تملي هناك الإتنين واقفين

الليل يصرخ جوه السرداب
و يقول و يعيد في كلام وعتاب
فترد الشمس تقول كداب
و نهارها يقوله أنا شفتك فين !؟

الشمس تبص شمال و يمين
و توشوش نورها بغمزه عين
و تقول راح أقوم أنعس ساعتين
و شويه و نور الشمس أهو غاب

و الليل دحلاب
لمح الإتنين من خرم الباب
قام فط أوام من عقب الباب
و فرد جناحاته في غمضة عين

الليل مسجون
وصبح سجان
قام حبس الشمس وري القضبان
فـ نهارها صرخ
اّه يا ليل خوان
فضحكله و قاله أنا شفتك فين !؟

و يطير الليل
في السما فرحان
يفرشها نجوم
 أشكال و ألوان
و قمر بنور
 يهدي الحيران
لو طير
 أو حتي يكون إنسان
بس العصافير
 لو شافوا الليل
يتداروا أوام جوه الأغصان


الليل بصاص
عمال بيعس علي الأبواب
و يوصل ألف جواب و جواب
الليل بـِصباص
و كمان خباص
غاوي الحكايات
فتح الجوابات
فضح الكلمات

مكتوب في جواب
هنعيش أحباب
و نموت أحباب
و جواب بيقول خلينا أصحاب
و جواب بيقول حبك كداب

و جواب فيه معاد كان بين إتنين
بس المسكين
نسي يكتب فين
ما الهوي غلاب
و الحبر أهو داب
في معاد و إنساب
يا خساره يا عين

و تملـّـي جواب
بيكون حيران
من غير عنوان
إمضاء
مجهول
و بقالوا سنين
عايش في عذاب
لّكنه ما تاب
و تملي الليل يفضل محتار
و يقول مسكين
و يقول ده لمين !؟


الحب نصيب
و الجرح نصيب
و ده كان مجروح
و أهوه طاف الليل
و لقاله طبيب
و ده يجري يطوف
بالليل ملهوف
و تملـّـي الحظ معاه بيخيب
ما الليل ده عجيب
و تملـّي غريب
ساعه يوصل رمش حبيب بحبيب
و يقول للتاني ملكش نصيب

الليل نسـّـاي
و ساعات قسـّـاي
و أهوه رايح جاي
يعزف ع الناي
و اللحن حزين
يجرح في الناس
و الناس مساكين
عايشين تايهيين
علشان دايبين
رايحين يستنوا الليل الجاي
دول ناس مجاذيب
غاويين تعذيب
متقولش إزاّي

عشاق الليل بانيين سراديب
جوه السرداب
و ضحايا الليل
و صبايا الليل
ماشيين تايهيين
زي الأغراب
و الليل وصـّـال
غاوي الترحال
يفتح شباك
أو يقفل باب

الليل بيفوح
بستان مطروح
بيرد الروح
و منين ماتروح
عشقك باين في العين مفضوح
الليل شباك
ع السما مفتوح
شباك الليل
مفتوح في سطوح
و قصاد منه شباك مفتوح
و ستاره وراها صبيه جنان
كما غصن البان
بضفاير تغزل في الألحان
و العاشق واقف كالددبان
واقف مجروح
ع الليل صعبان
مستني تبان
مستني عشان
يغزل أشعار
و العشق حنان
العشق جنان
فـ الليل يبعتله نسيم تيار
فيهز الشيش
يفتحله ستار
و أول ما تبان
يضرب خرسان
و الصوت بيروح
وأبو نص لسان
بكلامه مفيش
و الليل يحتار
و يقول يا حمار
خليك حيران
إنته الخسران
و الفجر يبان
يجروا الإتنين علي صدر الشيش
و يقولوا يا فجر يا ريت متجيش
فيشق أدان
و أبوها يقوم من النوم نعسان
يجروا الإتنين يتداروا أوام
و الليل يجري و يتداري كمان
و صاحبنا ينوح
أبو صوت مبحوح
و يبات مجروح
و يقوله يا ليل إنته الغلطان


الليل ونـّـاس
و سعات هجاص
لليل دراويش
و كمان حرافيش
والليل مسحور
هربان فيه النور
و في وسط الليل تايه عصفور
بجناح مكسور
و جناح متقصقص منه الريش
أصل العصفور
كان نفسه يعيش
بس إنته تعيش
ما يطير في الليل غير الخفافيش
والليل داير بيصب الكاس
و يشق سكون الليل اصوات
ضحكات صفرا
و تخبيط في كاسات
و الكاس بيدور
الكاس إتباس من كل الناس
لكن بيدور
من غير إحساس
و في ركن الليل
 قاعد صياد
لمح العصفور
عمال بيدور
و دموع في عنيه
قام عاش في الدور
جري يبكي عليه
و يقوله يا قلبي جرالك إيه
ناح العصفور
و حكاله حكايته
و كل ما فيه
نوح العصفور
وجع الصياد
رق الصياد
و بكل ما فيه
و بكل ما ليه
قام حن عليه
فجأة العصفور
و بكل غرور
قام قلب الدور
وربطتله إيديه
و فرد جنحاته وعدي السور
و لسع كرباج في الليل صياد
صياد الليل في الليل ينصاد
ما الليل له ناس
تنشال ع الراس
و الليل له ناس
م الناس تنداس

الليل ســّتار
و سعات مـّـكار
الليل لو جنه
أكيد فيه نار
الليل حواديت
حكايات و عبر
مليان أسرار
الليل كما بحر
و ماله قرار
وفي بحر الليل كام قارب تاه
فيه اللي الموج ع الشط رماه
فيه اللي غرق و الموج غطاه
و الليل بيقولك ياللاه إختار
دي قلوع مكسوره في قلب عليل
و دموع تتداري في جوف الليل
و شراع مفرود يضحك و يميل
و قلوب تتلاقي في حضن الليل
و إنته هتحتار
و تتوه في الليل

إن كنت قلوعك لسه صغار
خايف تنهار
سيبك م الليل
و بلاش م العوم ضد التيار
ده الليل أمواج
و الموج غدار
لو يعلي بيوصل ست إمتار
خليك في النور
ده الليل لو بحر
الشط نهار


.





السبت، 11 يونيو 2011

إنـســـــــان صعـلـــــــوك



فلسفـة غريزة التناقض الإنسانــي




الطلق بيضرب هنا و هناك
و بصوت مكتوم
و الباب مسكوك
و القيد مفكوك
و إنته لوحدك
بتقول نسيوك
مخلوق طبعك
و لا عاجبك حال
حتة صعلوك
و إن جيت للحق
إنته في ملكوت
متسلطن بين الحيا و الموت
ولاحدش لسه سمعلك صوت
بس إنته عبيط
مستعجل موت
عاوز تخرج
و تقول يا فكيك
هتموت و تفوت
بتنادي تقول
وروني النور
هــِدو الشبابيك
أصل إنته غشيم
ده إنته إن بصيت
هتلاقي العتمه دي نور حواليك
النور في عنيك
بس إنته تموت
و تعيش صعلوك
و في لحظه إنفتح الباب و نادوك
و إيديهم جايه خلاص يخدوك
مسكوك شدوك
م الدار للنار
جايين يخدوك
من عتمة نور
لضلام محبوك
فتحت عنيك
فلقيت النور
و كأن النور مغزول بالشوك
عمال تصرخ
بس ما سمعوك
و الكل هناك بيبحلق فيك
عاوزين يشوفوك
بتقول هتضحك
فبقيت مضحوك
مسكوك
و شالوك
بعدين قلبوك
و كمان ضربوك
و إنته بتصرخ
علشان يسيبوك
عاوز ترجع
فلقيت الدنيا دي باب مسكوك
حسيت بالخوف
حسيت بكسوف
إنته علي الباب
عريان مكشوف
فـ في حتة خرقه يا دوب لفوك
جايز غطوك
جايز ستروك
بس ما وعوُك
إن المتداري
ساعات مفضوح
و ساعات مهتوك
بعدين سـّموك
طلقوا الزغاريد
ضربوا المزازيك
فضلوا يهزوك
و لأبصر ما أدرك إيه قرصوك
علشان العين
ما الناس حسدوك
و كمان ببخور هندي بيرقوك
و بحبة ملح كمان رشوك
و أهي جت في عنيك
الكل عنيهم بصه عليك
لكن ما شافوك
فضلوا يرشوك
و الكل بيضحك و إنته أتاريك
فيه دموع في عنيك
بس ما فهموك
و شويه كمان قاموا جم كحلوك
وإنته بتبكي
و عمال تصرخ
و هما يلاعبوك

و عيال يشيلوك
و عيال حطوك
و عيال يبوسوك
مستغرب ليه علشان ما واسوُك ؟
ما علي ده الحال الكون حواليك
ساعه يحايلوك
ساعه يلاعبوك
و سنين ينسوك

سنتين فطموك
و سنين ربطوك
بعدين حدفوك
في البحر رموك
حتي ما فكوك
قدر و لطف
ده قدر مقسوم
إنك تنزل في البحر تعوم
و البحر غويط
مليان مليان
أشكال و ألوان
فيه سمك زينه
و تعابين
و حيتان
و كمان مماليك
و فيه برضوا ملوك
و إنته يا دوبك حتة صعلوك
بتعافر موج
و تهد في موج
فيهدك موج
بالموج حاوطوك
و يا دوب هتفوق
فتجيك موجه و ترميك من فوق
و كأن الموج عنقود مفكوك
و يجيلك طوق
فتقول الناس ع البر شافوك
بعتنلك طوق
لأجل ينجوك
بس إنته عبيط
دول اللي زمان كانوا شدوك
وأتاريهم جـُم علشان  يخدوك
أيوه إفتكروك
بعد ما سمعوك
و إنته بتصرخ علشان يسيبوك
علشان ترجع وري باب مسكوك
و من تاني إنفتح الباب و نادوك
و إيديهم جايه خلاص يخدوك
فخدوك
و شالوك
و كمان غسلوك
و في توب أبيض في أبيض لفوك
و إنته بتصرح لأجل يفكوك
عاوز يسيبوك
بس ما سمعوك
ع الكتف شالوك
و هناك حطوك
في الطل سابوك
بتراب غطوك
و بحبة ميه كمان رشوك
و شويه فاتوك
و شويه بكوك
بعدين تركوك
و إللي إفتكروك
في يومين نسيوك
و بقيت ذكري
مرسوم صوره
وفي إطار حطوك
و رجع من تاني الباب مسكوك
ما إنته يا إنسان
حتة صعلوك


.

السبت، 14 مايو 2011

أحــــلام ورَق



هربانه ليه بين السطور ؟
بين الحروف
وسط الورَق
و بترسمي بحروف كلام
فارس هـُمام
جوه الورَق
و تقضي عمرك تندهيه
و ما تلاقيه
بره الورَق
و بتبني كون من غير حدود
مليان ورود
فوق الورَق
والكون ده ليه أصبح قيود؟
و مالوش وجود
غير في الورَق
الحلم سطر بتحلميه
و أما تطوليه
فجأة تلاقيه
بيضيع في أول مفترَق
ده الحلم لو تعبانه فيه
أو عايشه ليه
ما يضيع
و لا في يوم يتسرَق
مهو كل مركب تبني فيه
تصحي تلاقيه
حبة حطام
مكسور
و فوق شطك غـَرق
مهو أصله كان
مركب كلام
مبني بكلام
من غير عرَق
و أديكي تايهه
 بترسمي
فارس كلام
بيه تحلمي
فـ الحبر سال فوقه إندلَق
هتفوقي إمتي وتفهمي
إن إنتي عشتي بتحلمي
أحلام في مركب ... من ورَق

.