إزاي اعمل مدونه ؟
اولا" ده سؤال استفهامي
يعني إنته بتسأل نفسك كيف أعمل مدونة؟
وليس سؤال استنكاري
يعني مش واحد قرفان أوي و مستعر من نفسه إنه عمل مدونة
عدد كبير جدا من إخونا اللي عندهم مرض الألتصاق بشاشات الكومبيوتر
بيسأل جوه نفسياته
إزاي اعمل مدونه ؟
،،،،،
وهوه اساسا مش عارف ليه هيعمل مدونه ؟
اه وربنا
عامل زي ( محمد ابو الحسن في مسرحية سك علي بناتك )
لما لقي ناس كتير وهيصه وزحمه
قالك ازاحم يمكن اخد صابونه
وإن شاء الله كله هياخد متقلقوش
وبيني وبينك انا كمان كنت بزاحم
ما علينا
المهم
بحكم خبرتي في عالم المدونات
احب اقولك التالي
( خبرتي دي اللي هيا يومين تلاته واللهي مش اكتر يعني )
برضو ما علينا
بحكم خبرتي دي بقي احب اقولك ان فيه شروط عشان تعمل مدونه
ومش اي شروط
دي شروط مجحفه ( بضم الميم )
أولا"
لازم تروح تشتري إستمارة ودع أهلك من الخزنة
والخزنة هتلاقيها هناك ،،، تاني باب علي بؤك الشمال
والاستماره دي عشان
لو
لو ليك زوجه ،،، طلقها
لو ليك ولاد ،،، شردهم
لو ليك أب و أم ،،، خليهم يتبروا منك
لو ليك نفس في حاجه ،،، إنسي
لو ليك اصحاب ،،، روح سلم عليهم وقولهم
مش عاوز اشوف وشكم تاني كتكم الأرررررف
ومتجيش بقي تعملي فيها الديب السحلاوي وتقولي
اه
مهو عشان اللي مالوش أهل ، أهل المدونات هيبقوا أهله
والكلام اللي ملوش لزمه ده
و بيجيب وجع في الجيوب الألفيه
عشان أنا أول واحد متبري منه
من الاخر يعني كلهم هنا هيبعوك
ده مش بعيد هما اللي هيبلغوا عنك
ثانيا"
تجيب جواب من الهيئة العامه لمحو الأمنية ( بضم الألف )
أيوه عشان دي مش بلد الأماني والاحلام هيه
خليك زي علي الحجار لما بيقول
( لو مش هتحلم معايا مضطر احلم لوحدي )
طول مانته فارش مشمع تحت منك
احلم لوحدك وبرحتك أوي
احنا متطمنين ع الاخر
ثالثا"
متعمليش فيها عز الدين أيبك وتتكلم في السياسه
المدونات متراقبه ومترشقه مخبرين
يعني كل عيش وانته ساكت
خليك شطور وإلـهـط بايدك اليمين
و متطلعش صوت وإنته بتاكل
هـــــــــس ،،،، إكتم خالص
يعني لو عاوز ترغي وتصدع اللي خلفونا
وتقول
وانته فاشخ بؤك
ومبتسم أووي بسنانك دي
تقول كالأتي مثلا
النهارده يا جماعه صحيت من النوم
اه وربنا
وبصيت في المرايا
فشوفتني قدامي
فقلت استغفر الله العظيم
إيه الخلقه دي
وبعد كده ضربت الجرس علي عم عثمان
عشان يجبلي الجرنال زي كل يوم
وبعد كده لقيت سنيه الشغاله بتخبط
وتقولي
انته صحيت يا سيدي
اجبلك الشاي يا سيدي
واللي هتفطر في الجنينه يا سيدي
الست الكبيره لسه نايمه يا سيدي
عشان كانت سهرانه في الديسكو تك يا سيدي
جدك الباشا عاوزك تعدي عليه في العزبه يا سيدي
،،،
وبعد كده بقي خد عندك كلام لحد
عبدو السايس بيقولك يحضرلك الفرسه الأبيضه يا سيدي
واللي الفرسه الأحمره يا سيدي
واللي الأخضره يا سيدي
عشان تليق ع البنطلون بتاعك الأخضر يا سيدي !!!؟؟؟
مش عارف أنا ايه البنطلون الأخضر ده ؟؟؟؟؟؟
أو ان انته مز والبنات هيتهطلوا عليك ،،،،
كلفدان صحبتك عاوزاك ع التلافون يا سيدي
نازلي صحبتك بتقولك مستنياك ع الغدا يا سيدي
روحيه هانم و تفيده هانم
وام هاشم هانم والكتعه هانم
بيقولولك هتيجي النادي النهارده يا سيدي ؟
ألخ ألخ ألخ ،،،،
قول يا عم قول
وربنا مش هنزعل
المهم زي ما قلتلك
إنسي حكاية عز الدين أيبك دي خالص
لأنه خلاص
مفيش فايده
،،،
ما علينا
وصلنا لحد فين كده ؟
،،،
اه
رابعا
متجيش تقولي كلام من النوعيه دي
اصل انا مخنوق
اصل انا متضايق
الدنيا ليه بقت كده
البلد ايه اللي جرالها
الحياة بقت وحشه
الناس اتغيرت
انا هنتحر
انا مكتئب
انا قرفان
هتلاقيني قمت مديلك بضهر ايدي من غير لا احم ولا دستور
قرفان مين وإنته اساسا هدومك نفسها قرفانه منك
وناس مين اللي اتغيرت ؟
إنته كنت عايش في الصومال يبني إنته ؟
وبلد ايه اللي مش عجباك
لو مش عجباك غور منها
ما الحياه فل الفل
لونها وردي وبنفسجي كمان
انته بس اللي محتاج نضاره
إوعي تكون شيوعي ياض إنته ؟
الناس مش ناقصه غم وحياة ابوك
عندك كلمه حلوه دوونها
مفيش يبقي تهوينا
احسنلك واحسن للبشريه كلها
خامسا
لو فرضنا إنك اتهببت وعملت مدونه
ولو فرضنا برضو انك اتنيلت علي عينك
وعملتلك بوست واللي اتنين والسبوبه لعبت معاك
وجه اي حد يعلقلك علي البوست ويقولك
الله
يخرب بيت افكارك
ايه العظمه دي
ايه يا عم العبقرينو اللي انته فيه ده
بجد مشفناش كده
عباس العقاد لو كان شافك كان انتحر
وكده يعني
ألخ ألخ ألخ
وهوه ولا قري ليك اي حاجه اساسا"
وجه في الاخر
وقام رزعك لينك للمدونة بتعته هوه
وكتب بقي كلام من نوعية
زورونا تجدوا ما يسركم
واسعارنا لا تقبل المنافسه
مدونة خدمة اربعة وستين ساعة يوميا"
و لو انته جاي علي المدونة بتعتي من صلاح سالم
هتلاقي مستشفي ام المصريين علي ايدك الاتنين وانته داخل
وقدام وشك هتلاقي موزتين مستنينك عشان يستقبلوا سعادتك
و يشوفوا طلبات سيادتك
اعقل انته و مـتــتــزرزرش
ومتعمليش فيها محمد نجم
ومتحسسناش انك الحج مهند
خليك جدع
سيبه ياكل عيش
سادسا"
متعملناش فيها عم الموصلح الموجتماعي
اي موضوع وتقوم مشمر دراعك
وعاملنا فيها مفتي الديار الفلبينيه
وهاتك يا فـتاوي القهاوي
لان فيه ناس علي قد حالها
وبتصدق اي كلام طالما موجود ع النت
( عاملين زي المشهد مش فاكر بتاع مين ،،،
لمواطن راح يطلع مستخرج من جهه حكوميه
فالموظف قاله
مش هينفع عشان انته خلاص مثبوت عندي ان انته ميت
فلما المواطن استغرب وإتجراء علي عينه وقال للموظف
ميت إزاي وانا قدامك اهوه صاحي؟
الموظف قالوه
انته اتهطلت في نافوخك ؟
انته هتعرف اكتر من الحكومه واللي ايه ؟
الورق قدامي بيقول انك كان عندك أتب في ضهرك وإنك ميت بالسل من ست سنين
وقام مزعق وقال
اللي بعده )
بجد لسه فيه ناس كده !!! ؟؟؟
ما علينا
متجيش تعملنا فيها سمير غانم وتقول انا قريت في مجله ميكي ماوس احصائيه بتقول ،،،،،،
وتقوم كارر كلام إنته ذات نفسك مش فاهمه اصلا"
البلد مش ناقصه فــتـــي
مش كفايه واحد زمان حلل للمسؤلين في فرنسا
انهم يخلوا بناتنا المسلمين يقلعوا الحجاب في أي مؤسسه حكوميه بالإجبار
وقالك
دي بلدهم وهما احرار فيها !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
واللهي برافوا يا عم الشيخ !؟ !؟ !؟
سابعا"
لو بتحب الشهره وعاوز مزز وحركات وكده
وغاوي بقي تتحفنا بصورك
وحجات كده تربت تـتـتي وتربت تـتـتوه
متجيش تتصورلي جنب عربيه بي ام دبليو
وتقول
دي صورتي وانا في منافلتنا اللي في مارينا
واخدلي بالك انته
لو راجل اتصور وانته جواها
مشيها صوره جنب 128 وانته علي ناصية شارعكم في باب الشعريه
هتبقي مبلوعه
انا مش فاهم ازاي لو واحد عنده بي ام دبليو
هيعمل مدونه ليه اساسا"
وربنا لو عندي العربيه البي ام دي لكنت افضل راكبها لحد ما اموت
بعد الشر يعني
مدونات ايه يا جدع وكلام فاضي ايه
( معلش الشويه اللي فاتوا دول
كان فيهم حبة حقد جامد اوي
بس اصلي بموت في العربيه دي )
ما علينا
واللي الاخت اللي مغرقانا صور هيه وسعادة البيه الباشا الدبدوب بتاعها
وهيه حضناه
وكمان بتبوسه من بؤه
راعي مشاعر الشباب اللي هيتجوز علي روحه ده
هما بيتلككوا اساسا"
و عيب اوي تتصوري وانتي حاضنه الدبدوب يا هانم
هوه مش مذكر ده ؟ ( مذكر بضم الميم )
كتبتوا الكتاب قبل ما تتصوروا الصوره دي ؟
هه؟
ثم الدبدوب ده انا شفت امه كذا مره قبل كده !!!
وكان متصور مع مزز برضوا !!!
ده باين عليه دبدوب سالك
و شقي جدا خالص مالص
الله يسهلك يا عم الدبدوب
ماشيه معاك زمبليطه
ثامنا"
وفي رائيي ده اهم شرط
إنك تكون
واحــــد فااااااااااااضـــي !!!!!!؟؟؟
ومتسألنيش إزاي دي
انا عارف انه شرط صعب جدا" عليك
سلام مؤقت
عشان انا مش فاضي
بس لو إفتكرت حاجه تاني
هبقي أجي وأدشها هنا
الاشتراك في:
تعليقات الرسالة (Atom)
.jpg)
.bmp)
i see him in your writting. plz write more again
ردحذفana mesh 3awza a3mel modwana bs 3awza akon moshtareka dayman fi modwentak,
ردحذفyou Allready in
ردحذفههههههههههه صح كلامك..دا الواحد بيشوف فى عالم التدوين دا حجات عجبى
حذف