يادي الاحراج يا حنتوسه

لما سالني الواد حنتوسه
وحنتوسه ده ابن جارتنا
***
عمو يا عمو بتعمل ايه ؟
قلت انا قاعد
رد عليا
قاعد ليه ؟
قمت قايله
قاعد فاضي
***
تاني سالني الواد حنتوسه
طيب ليه ؟
روحت قايله
اصل انا عاطل
تاني بيسال
عاطل ليه ؟***
وشي اصفر ،،،
وقلب احمر ،،،
وقام اخضر
***
ام الواد حنتوسه اتكسفت
قامت قالت
بس يا واد عيب تحرج عمك
***
قام الواد بصلها وتنح
واحرجه ليه ؟
هوه فيه ايه ؟
***
قام متدور ليا وقايل
عمو يا عمو رد عليا
قاعد ليه ؟
قمت قايله
اصل وفصل وكيييييت و مييييييت***
قام الواد بصلي مستغرب
عمو يا عمو
انا مش فاهم
قمت انا ضاحك
يعني انا فاهم ؟
***
ام الواد حنتوسه اتخنقت منه و زعقت
بس يا واد اختشي علي دمك
***
قمت انا قايل
بس سيبيه
***بص يا حنتس
اصل القصه طويله عريضه
***
قام غلس وقايلي
 ما تحكي
***
يادي النيله !!!
***
روحت انا سأله
احكي في ايه ؟
بص وقاللي
احكي القصه
***
يادي الحوسه !!!
***
قمت قايله
اصل يا حنتس انا مش فاضي
قام برقلي وبص وقالي
تيجي ازاي ؟
مانته يادوبك لساك قايل
انك فاضي***
يادي النيله !!! و يادي الحوسه !!!
***
امه شفتني وانا متلخبط
بضرب بقلب
قامت هبت
في الواد صرخت
ياللاه يا حنتس عمك يزعل
***
قمت انا قايل
بس سيبيه
***بص يا حنتس
انا مش عارف عاطل ليه
بس اكيد بكره هتتعدل
قاللي ازاي ؟
قولتله ايه ؟؟
قاللي  ازاي بكره هتتعدل ؟
***
يادي النيله !!! و يادي الحوسه !!!
***
قمت انا هارش
قمت مفكر
سرحت مني دماغي وقالت هيه كمان
أيوه صحيح ازاي تتعدل
طول ما الواغش فيها مخلل
عمال يهبش فيها ويكبش
واحنا نصقف ،،،هوه يطبل
نضحك نرقص ،،، تاني يطبل***
فوقت لقيت الواد حنتوسه عمال يصرخ
عمو يا عمو
سرحان ليه ؟
قلت اتوهه روحت قايله
ياللاه يا حنتس روح والبس
علشان نخرج
قام ناطط علي كتفي وقاللي
هنروح فين ؟
قلت انا شايف واحد ماشي
وماسك طبله
هنروح نرقص
هوه يطبل
واحنا نصقف***
قام الواد بصلي مستغرب
قاللي بنبرة صوت قرفان
لاء مش هينفع
قلتله ليه ؟
قاللي اساسا انا مش فاضي
وقام بصلي من فوقي لتحتي
وقام ماسك جلابية امه
وقالها ياللاه
وقام رافع مناخيره وقاللي
ياللاه سلاااااااام

قمت متنح

مااااااشي يا حنتس !!!

،،،،،،،،،،،