يـخــرب بـيـت الـتــدويـــن !!!؟

يخرب بيت التدوين ع اللي دونوه
النهارده يعتبر اول يوم فعلي ليا بعد التدوين
وده لاني قضيت اكتر من 48 ساعه صاحي نايم علي روحي
بس مفنجل عنيا
وبتاوب بمعدل تتوبتنن كل فيمتو ثانيه
ده غير خراب البيوت المستعجل
لأن كل تتوبتين تلاته ،،، كوبايه قهوه
لحد ما البن خلص فــدخلت ع الشاي
وقهوه وشاي يعني سجاير
وانا من النوع اللي بيشرب سجاير لحد ما شعر دماغي يكح
ما علينا
وبرغم إني ظبتني كذا مره وانا دماغي بتسقط مني جوه الفالنه

أو الفانله ( أيهما أقرب )
بس كنت بئاوح
واقول
هعمل مدونه يعني هعمل مدونه

يعني هيه جت عليا انا وقفلت

ما عمك سيد الفسخاني عامل مدونه ومسميها

فساخوني ولا سألوم فيا

والواد كريم بتاع البلاي ستيشن عامل وحده مسميها

دروجبا بين التنظير والتمصير

و وحده تانيه مسميها

شوت وانا اشوت ، مين شوووويــت فينا ؟

وخالتك الطاف اللي بتعمل الجمعيات ووبتبيع هدوم بالقسط عامله مدونه اسمها

سوق التلات ، اللي بيتعمل يوم السبت

اشمعني انا يعني ما ادون احسن ما اطق
وطبعا ممكن كابتن تربنتينا اللي بيتفرج عليا من مدرجات الدرجه التالته
و اللي زي حالاتي اكيد
يسألني ويقولي

يا كابتن محتاس افندي
إنته قضيت اكتر من 48 ساعه في مدونه !!!
ليه كده !؟

هيه كانت مدونة السيد البدوي ؟؟؟

طبعا مش هقوله : وانته مال ( تـيـــــــــــت )
بس هوه رد ع السؤال لما نادالي باسمي
ما اصل انا نسيت اقول إن محتاس ده اسم وكمان صفه

( عقبال عندكوا يعني )
بس ومع ذلك هرد عليه ده مهما كان مشتري تذكره برضوا وجاي يتفرج
المشكله اني في خلال ال 48 ساعه دول يا تربنتينا يا اخويا

عملت ييجي عشرة وأربعين مدونه
ع الورق طبعا
و علي سبيل المثال لا الحصر

موش أأني ، ده كيبوردي
مش فاهم
رز بالمحشي
حاجه ببلاش كده
ماشي جوه الحيط
نطلع واللي ننزل
أنا مع الـحـق ـكومه
بكلم نفسي
لم ينجح أحد
ميحكمشي
معااااهم المنطق المشوي
يسقط الاستقلال
زغطه أفندي ( بضم الـ زاء )

وكنت خلاص استقريت علي( زغطه دي )
بس للامانه لقيت فيه منتدي اسمه زغطه او حاجه كده
وفجأة كده وانا محتاس
لقيت شعر ايدي وقف
ومناخيري صغرت
ولقيت كده الشاشه داخله عليا
وحسيت إن النداهه بتندهني
وبقدرة قادر لقيت الكيبورد بيكتب صيني لوحده
( انا قلت يمكن لانه كيبورد مستورد طبعا )
وإذ فجأة" تاني لقيت ( أنا ) اللي في نافوخي بيبعتلي بليز كول مي
مع إني لسه شاحنله حته بعشره من يومين
المهم
كلمته
أيوه يا ( أنا ) ,,, خير ؟
طب قول سلاموا عليكوا ،،، انته مش بتكلم مبوله
طيب يا سيدي سلاموا عليكوا ويا ريت ننجز عشان الدقيقه هتخلص
انا اساسا محتاس ومش ناقصك
ماهو انا بكلمك عشان كده
عشان ايه ؟
مش انته محتاس ؟
اه
طب خلاص سميها محتاس

وقام قافل قبل ما الدقيقه تخلص
يا بن الايه يا لذينا يا ( أنا )
قفلت قبل الدقيقه ،،، لاء أصيل
طب وانته جبت ايه جديد

ما كلنا عالم محاتيس
ما أنا محتاس
وانته محتاس
وانتي محتاس (ه)
والكابتن ابو جلابيه مخططه بالطول اللي هناك ده برضوا محتاس
والانسه اللي قاعده بقالها ساعتين قدام الدولاب وبتفكر

ال محتاره تلبس ايه عشان تنزل تقابل صاحبها

اللي بيشتغل تباع علي ميكروباص

دي برضوا كمان محتاسه
مع ان دولابها اساسا مفهوش غير

عبايه سوده وبجامة اخوها اللي بتنام فيها

والهدوم دي اللي هيه ،،، استغفر الله العظيم

ثم ده اساسا اساسا مش دولاب

ده كرتونه شيبسي وبتحط فيها الهدمتين

هنستعبط علي بعض
ما علينا
المهم لقيت شعر ايدي وقف تاني
و مناخيري ألخ ،،،،،،،،،،،،،،،،
وهنا لقيتني قمت متشقلب وناطط

و وقفت علي طرف الترابيزه

وانا حافي طبعا عشان متتوسخش دنا شاريها بميت جنيه

ما علينا

و قمت مزعق زي بتوع عربية الفول
و علي طريقة عم صابر اللي فاتح كشك سجاير فوقينا

وجدتهـ هـ هـاااااااااااااااااااااااااااااا
نــــافــــــــش و مـنـفـــــــــــوش
وانا محتــــاس بينهمومن ساعتها يا اخويا وبقيت حاسس اني بقيت الحج ( كونفوشيوس )

مش عارف ليه كده هبط عليا احساس من السما

اني خلاص بقيت حد حكيم

مش حكيم بيدي حقن يعني

لا حكيم من اللي بيقولوا حكم والكلام اللي مياكلش عيش ده

وحسيت ان شعر دقني كبر ولونه بقي ابيض

وبقيت ابص للامور بنظره اعمق متعرفش ازاي

طب ما هو موضوع البصه العميقه ده ممكن يجي علي نافوخي

كده لوحبيت ابص لست بصه عميقه

ممكن البسلك قضيه تحرش بص جنسي

ما علينا

بقيت حد تاني بيوزن الامور

مع اني مش عارف هوزنها ازاي

يعني بالرطل واللي بالكيلوا ؟ ،،، واللي بالشويه واللي ايه ؟

المهم انا شكلي كده اتهطلت

واعراض البدنجان اللي لسه متعشي منه ظهرت واللي ايه ؟؟؟

مهو انا اللي استاهل برضوا

فيه حد يتنيل يتعشي كده

بدنجان مشوي

وبدنجان مقلي

وبدنجان مخلل

وبدنجان محشي( بس محشي بدنجان برضوا مش رز زي الناس الفقرا )

وختمتها وحليت بــ بابا غنوج ,,, قابل بقي اللي هيجرالك
بس الخلاصه اني بقيت شايف كل حاجه بمنطق كونفوشسياوي

كونفوشسياوي بحت يعني ،،، و ـــــــــ،،،،
و للكلام بقيه